Yazıçı-tərcüməçi, filologiya elmləri doktoru, professor Zeydulla Ağayev uzun sürən xəstəlikdən sonra ömrünün 69-cu ilində vəfat edib. Zeydulla Ağayev 1945-ci il martın 2-də Masallı rayonunda anadan olub.  Pedaqoji Xarici Dillər İnstitutunun ingilis dili fakültəsini bitirib. Əmək fəaliyyətinə həmin institutda başlayıb, “Bilik” qəzetinin redaktoru olub.

Zeydulla Ağayev həm öz orijinal nəsr əsərləri, həm də ingilis dilindən etdiyi tərcümələri ilə tanınıb. Azərbaycan oxucusu onun tərcüməsində Cek London, Artur Konan Doyl, Teodor Drayzer, Ernest Heminquey və başqalarının roman, povest və hekayələri ilə tanış olub. Zeydulla Ağayevin 1990-cı ildə nəşr etdirdiyi müasir Amerika yazıçısı Artur Heylinin “Aeroport” romanı milli ədəbiyyatımız tarixində birbaşa ingilis dilindən tərcümə edilmiş ilk romandır.

Ağayev həm də “Müasir Azərbaycan nəsri”ni ingiliscəyə çevirmiş ilk bədii tərcümə sənətkarlarından biri idi. O,İsmayıl Şıxlı, Anar, Elçin, Sabir Əhmədli, Yusif Səmədoğlu və başqalarının bir sıra hekayələrini ingilis dilinə çevirib və çap etdirib.

Ağayev bir sıra nəsr kitablarının da müəllifidir: “Məhəbbət nəğməsi”, “Beş günün intizarı”, “Yenilməzlik”, “Dünyanın düz vaxtı”…

Ağayev  Dillər Universitetində elmi işlər üzrə prorektor, ədəbiyyat tarixi kafedrasının müdiri vəzifələrində çalışıb. 1980-ci ildə namizədlik, 1997-ci ildə isə doktorluq dissertasiyaları müdafiə edib. Bir monoqrafiya, 70-ə yaxın elmi, yüzdən çox publisistik məqalənin müəllifidir.