Mədəniyyət və Turizm Nazirliyi dövlət təsnifatından keçərək «ulduz» almış mehmanxanaların sayını açıqlayıb. Bu gün yalnız 48 mehmanxana və mehmanxana tipli obyekt dövlət təsnifatından keçməklə «ulduz» kateqoriyası ilə fəaliyyət göstərir. Həmin mehmanxanaların 19-u «beş», 22-si «dörd», 5-i «üç», 2-si «iki» ulduzludur.

«Beşulduzlu» hotellərin 15-i, «dördulduzlu» hotellərin 12-si, «üçulduzlu» hotellərin 4-ü Bakıdadır. «İkiulduzlu» hotellər isə rayonlarda yerləşir.

Nazirlikdən deyilib ki, mehmanaxanalara verilən «ulduz» kateqoriyası 3 il ərzində qüvvədə olur. Dövlət təsnifatından keçmiş hotellərin əksəriyyətinin ulduzlarının qüvvədə olma müddəti ötən ilin dekabr və bu ilin yanvar ayında bitib. Həmin hotellər 2010-cu ilin dekabrında və 2011-ci ilin yanvar ayında dövlət təsnifatından keçiblər. Hazırda nazirlik həmin hotellərə yenidən «ulduz» kateqoriyasının verilməsi üçün edilən müraciətləri araşdırır.

Ötən ilin yanvar-iyun aylarının rəqəmlərinə əsasən, Azərbaycanda 516 mehmanxana və mehmanxana tipli obyekt var.