Türkiyəni silkələyən 2013-cü ilin 17 dekabr “korrupsiya və rüşvət” əməliyyatının koordinatoru, prokuror Zəkəriyyə Öz ittihamlarla üz-üzə qalıb. Bu xəbəri Türkiyənin “dünyabülteni” xəbər saytı yayıb.   O əməliyyatda saxlanılan və sonradan sərbəst buraxılan, milyard dollarla ölçülən layihələrinə həbs qoyulan iş adamı Ali Ağaoğlu prokurorun Dubay istirahətinin xərclərini çəkdiyini bildirib. Z.Öz iş adamının bu iddiasına “Dubayda ailəmlə tətildə olmuşam, amma xərcimi özüm çəkmişəm, iddialar yalandır” cavabını verib.

Adı çəkilən əməliyyat nəticəsində Türkiyənin bir sıra nazirinin övladları, iş adamları, bank rəhbərləri şübhəli şəxs qisimində saxlanılıb və çoxsaylı həbslərə səbəb olub.

Bu əməliyyat zamanı həbs edilənlərin cinayət işinin istintaqını aparan prokuror Cəlal Kara baş nazir Ərdoğanın açıqlamasını təkzib edib.Adı çəkilən açıqlamada baş nazir Ərdoğan prokuror Karaya işarə ilə “prokuror əli cibində, “iki dəqiqə vaxtın var, anlat və çıx, gəlsin indi əfəndiləriniz sizi qurtarısn” deyə saxlanılanları hədələyir” açıqlaması vermişdi.

Kara vəkili vasitəsilə baş nazirin bu açıqlamasına “baş nazirin mənə aid etdiyi davranış və ifadələr gerçəkdən uzaq və iftiradır” qarşılığını verib. Qanunlar çərçivəsində bütün saxlanılanlara fərq qoymadan vəzifəsini yerinə yetirdiyini, müttəhimə ifadə üçün lazım olan müddətin də tanındığını nəzərə çatdırıb.