Ötən gün Təbriz və Urmiya şəhərləri başda olmaqla azərbaycanlılar küçə və meydanlara axışaraq, “Traktorsazi” komandasının uğurunu qeyd ediblər.  Güney inforlmasiya qaynaqlarına  istinadən,   futbol üzrə ölkə çempionatında mübarizə aparan Təbrizin “Traktorsazi” komandas bir tarix yazaraq ilk dəfə İran Kubokunu qazanması soydaşlarımızın böyük sevincinə səbəb olub.

Minlərlə insan Azərbaycanın üçrəngli, ay-ulduzlu bayrağını dalğalandıraraq, milli musiqi sədaları altında rəqs edib, “Azərbaycan bir olsun, mərkəzi Təbriz olsun!”, “Azərbaycan var olsun, istəməyən kor olsun!”, “Ya, ya, ya, şa, şa, şa, Azərbaycan çox yaşa!”, “Azərbaycan bizimdir, Əfqanıstan sizindir!”, “Təbriz, Bakı, Ankara, biz hara, farslar hara?”, “Biz ölməyə hazırıq, Babəkin sərbazıyıq!”, “Haray, haray, mən türkəm!”, “Türk dilində mədrəsə, olmalıdır hər kəsə!”, “Urmiya gölü can verir, məclis onun qətlinə fərman verir!”, “Gəlin gedək ağlayaq, Urmiya gölünü dolduraq!”, “Durnalar küsməyin, gölümüz bir daha dolacaq!” və digər şüarlar səsləndiriblər.

Qeyd edək ki, “Traktorsazi” İran Kubokunun fevralın 14-də keçirilən finalında Kirman şəhərinin “Mis” komandasını 1:0 hesabı ilə məğlub edib.

“Traktorsazi” İran Kubokunun sahibi olmaqla gələn il Asiya Çempionlar Liqasında mübarizə aparmaq hüququ da qazanıb.