Xəzər Universitetində   Britaniya Şurasının  Azərbaycan nümayəndəliyi Xəzər Universiteti  və Nottinqam Universiteti ilə birgə “Tədqiqatçı əlaqələri” layihəsi çərçivəsində  ilk seminarı martın 25-dən davam edir və sabah tamamlanacaq. Mövzu “Azərbaycan və Birləşmiş Krallıqda təhsil liderliyi və siyasəti: məktəblərin təkmilləşdirilməsi ilə bağlı potensialın yaradılması” dır. “Tədqiqatçı əlaqələri” layihəsinin məqsədi Birləşmiş Krallıq  və Azərbaycanda ümumi tədqiqat maraqlarını bölüşən,  yeni karyera quran elmi tədqiqatçı qrupları arasında  əlaqələr qurulmasına  imkan yaratmaqdır.

Seminarı professor Hovard  Stivenson (Nottinqam Universiteti) və filologiya üzrə fəlsəfə doktoru Elza Səmədova (Xəzər Universiteti) koordinasiya edirlər. Digər aparıcı tədqiqatçılar professor Kris Day (Nottinqam Universiteti) və professor Hamlet İsaxanlı (Xəzər Universiteti) da  seminara qatılıblar. Seminarda təhsil liderliyi və təhsil siyasəti üzrə ixtisaslaşan Azərbaycandan 16 tədqiqatçı və  Birləşmiş Krallığın müxtəlif ali təhsil müəssisələrindən 13 tədqiqatçı öz tədqiqat nəticələrini müzakirə etmək üçün toplanacaq  və  bu seminarın nəticələri növbəti  ay Azərbaycanda nəşr olunacaq.

Xəzər Universitetinin təsisçisi,  Direktorlar və Qəyyumlar şurasının sədri professor Hamlet İsaxanlı layihəyə öz münasibətini bildirərək dedi: “Elmi  tədqiqatlar sizin öz sahənizi nə dərəcədə bilmənizdən və  daim inkişaf edən beynəlxalq tətqiqatçılar şəbəkəsindən asılıdır. Təcrübəli alimlərin tez-tez səyahət etmək imkanları var, amma bu seminarın xüsusiyyəti gənc tədqiqatçılara zəruri imkanlar yaratmaqdan ibarətdir.  Onların hər birinə uğurlar arzulayıram ”.

Britaniya Şurasının Azərbaycandakı direktoru Elizabet Vayt  bildirdi:  “Bu seminarın məni xüsusilə maraqlandırmasının səbəbi sadəcə olaraq,  Britaniya və Azərbaycan arasında tədqiqatların bölüşülməsi deyil, həm də  seminarın mövzusunun Təhsil Nazirliyinın təklif etdiyi məktəblərin inkişaf etdirilməsi üçün bacarıqların aşılanması kimi islahatların burada öz əksini tapmasıdır.  Ümid edirəm ki, seminarın nəticələri tədqiqatçılar və  təhsil siyasətinin qurucuları üçün faydalı olacaq”.

Layihə haqqında daha ətraflı məlumat əldə etmək üçün [email protected] email ünvanı ilə əlaqə saxlaya bilərsiniz.