Ötən il fevralın 6-da dünyasını dəyişən Şaiq Vəlinin “Eşq və şərab” adlı şeirlər kitabı “Elm və təhsil” nəşriyyatında işıq üzü görüb. APA-nın xəbərinə görə, “Avrasiya Press” nəşriyyatında hazırlanan kitabın naşiri Beynəlxalq Avrasiya Mətbuat Fondunun sədri Umud Rəhimoğlu, redaktoru isə İbrahim İlyaslıdır.

Kitaba şairin təsəvvüfi obraz və simvollarla süslənmiş xalq şeirimizin klassik formalarını modern bir biçimdə özündə əks etdirən şeirəri daxil edilib. Yaxın günlərdə kitabın təqdimatı olacaq.

Kitaba ön söz yazan Umud Rəhimoğlu şairin yaradıcılığını belə dəyərləndirib: “Sənin Azərbaycan poeziyasında fəth etdiyin Şaiq Vəli zirvəsi ən uca, ən nəhəng zirvələrdən biridir. Bunu bilənlər bilir. Bunu bilməyənlərə də bunu bilənlərlə əlahəzrət zaman və sənin bu kitabın zamana-zaman bildirəcək”.

Mərhum   Şaiq Vəli 1950-ci ildə Qazax rayonunun Aşağı Əskipara kəndində doğulub. 1993-cü ildə Moskvada Maksim Qorki adına Ədəbiyyat İnstitutunun poeziya fakültəsini bitirib. 1989-cu ildən Azərbaycan Yazıçılar Birliyinin üzvü olub. 1983-cü ildə “Dünyanın sahili” adlı ilk şeirlər kitabı nəşr olunub.