Yaxın vaxtlarda Azərbaycanla Türkiyə arasında birgə raket istehsalına dair yekun sənəd imzalanacaq. Azərbaycandakı müəssisələrdən birində ROKETSAN-ın iştirakı ilə 107 və 122 mm çaplı reaktiv raketlərin istehsalı nəzərdə tutulur.

 Yaxın vaxtlarda Azərbaycan Müdafiə Sənayesi Nazirliyi (MSN) ilə Türkiyənin ROKETSAN şirkəti arasında Azərbaycan müəssisələrinin birində raketlərin istehsalının başlanılmasına dair yekun sənədin imzalanması gözlənilir. Bu barədə APA-ya Türkiyə Müdafiə Sənayesi Katibliyindən (SSM) məlumat verilib. Birgə istehsalla bağlı texniki məsələlər həllini tapıb. Artıq istehsal prosesinin başlanılması üçün zəruri tədbirlər görülüb. SSM-dən yekun sənədin nə zaman imzalanacağı barədə əlavə məlumat verilməyib.

Razılaşmaya əsasən, Azərbaycandakı müəssisələrdən birində ROKETSAN-ın iştirakı ilə 107 və 122 mm çaplı reaktiv raketlərin istehsalı nəzərdə tutulur. Raketlərin mühərriki ROKETSAN, digər hissələri isə Azərbaycan müəssisəsi tərəfindən istehsal ediləcək. Raketlərin istehsalına dair tərəflər arasında müzakirələr 2008-ci ildən başlanıb.

Hazırda ROKETSAN tərəfindən istehsal olunan 107 mm çaplı raketlərin atış uzaqlığı 11 km-dən, 122 mm çaplı raketlərinki isə 40 km-dən (keçmiş sovet-Rusiya analoqlarından 2 dəfə çox) çoxdur.