Bakı Şəhər Baş Polis İdarəsinin saytında Elnur Məcidlinın axtarışda olması barədə məlumat yerləşdirilib. O, Konstitusiya quruluşunun zorla dəyişdirilməsinə yönələn çağırışlar etməkdə təqsirli bilinir.

Bakı şəhər sakini, 1984-cü il doğumlu Məcidli Elnur Abdulla oğlu 4 aprel 2011-ci il tarixdən Nəsimi Rayon Polis İdarəsi tərəfindən CM 281.1-ci (Dövlət əleyhinə yönələn açıq çağırışlar — hakimiyyətin zorla ələ keçirilməsinə, zorla saxlanılmasına və ya Azərbaycan Respublikasının Konstitusiya quruluşunun zorla dəyişdirilməsinə və ya ərazi bütövlüyünün parçalanmasına yönələn açıq çağırışlar etmə) maddəsi ilə axtarışdadır.

 CM-nin bu maddəsi ilə təqsirləndirilən şəxsi 5 ilədək müddəti azadlıqdan məhrumetmə cəzası gözləyir.  Məcidli sosial şəbəkələrdə “11 mart — Böyük Xalq Günü” və “2 Aprel-Böyük Qəzəb Günü” aksiyalarının təşkilatçısı qismində tanınaraq barəsində cinayət işi başlanıb. Məcidli hazırda Azərbaycanda olmadığı üçün onun tutulması üçün barəsində beynəlxalq axtarış elan olunub.

Baş Prokurorluq isə 2011-ci ildə məlumat yayaraq, təqsirləndirilən Elnur Məcidli barəsində cinayət işinin icraatının 2011-ci il iyunun 2-də dayandırıldığını açıqlayıb.