NİDA fəallarının işi üzrə məhkəmədə vəkillərin çıxışları başlayıb. Bu gün xüsusi təhlükəsizlik tədbirləri görülüb: məhkəməyə gələnlərin hamısı yoxlanılıb. Jurnalistlərin çoxu zala buraxılmayıb. Müttəhimlər zala gətirilən zaman alqışlarla qarşılanıblar. Eyni zamanda küçədə alqış səsləri eşidilib. Jurnalistlər müttəhimlərlə söhbət edə biliblər. 6-cı gündür ki, aclıq edən bir çox fəallar çox solğun görünüblər.

Rəşad Həsənov zala səslənərək “biz aclığı dayandırmayacağıq” söyləyib. Bəxtiyar Quliyev deyib ki, axşam halı pisləşib. Rəşadət  Axundov qeyd edib ki, mədəsi ağrıyır.

Zaur Qurbanlı müttəhimlərin valideynlərinin aclıq etməsi ilə bağlı deyib ki, onlar valideynlərin aclığı dayandırmasını istəyirlər.

6 gün ərzində yalnız bir dəfə həkim onları müayinə edib. Beynəlxalq təşkilatların nümayəndələrinin onlara baş çəkib-çəkməsi barədə sualın cavabında İlkin Rüstəmzadə deyib ki, nə Qırmızı Xaç, nə də ombudsman nümayəndələri onlara baş çəkməyiblər.

Sonra vəkil Əsabəli Mustafayev cinayət işinin saxtalaşdırıldığını bildirib, müttəhimlərin “mütəşəkkil cinayətkar qrup” olması barədə fikrilərin əsassız olduğunu söyləyib.

“Molotov kokteyli” əslində alışdırıcı maddə olub. Sonradan butılkalara içərisində barıt olan şprislər bərkidilib və partlayıcı qurğu kimi təqdim edilib. O, məhkəmədən bəraət haqda qərarın çıxarılmasını xahiş edib.

Vəkil Yalçın İmanov da cinayət işini uydurma adlandırıb və  qeyd edib ki, bütün müttəhimlərə eyni ittihamlar irəli sürülüb.

İstintaq müttəhimlərin mütəşəkkil cinayətkar qrup olmasını sübut etməyib. Dəqiq vəzifə bölgüsünə və funksiyaya, ciddi intizama, cinayətkar  fəaliyyətdən gələn gəlirin bölünməsi üzrə konkret planlara malik olan birliklər bu cür qruplar sayılır. O, hakimi hökmü oxuyarkən zalda oturanların gözlərinin işinə baxmağa çağırıb.

Hakim Cavid Hüseynov vəkilə irad tutaraq deyib ki, o, müdafiə nitqi ilə çıxış etməlidir, ittihamnamə ilə yox.

İmanov bildirib ki, fəallar ifadə azadlığı hüququnun reallaşmasına görə həbs olunublar. Onların barəsində Avropa İnsan Hüquqları Konvensiyasının 3,5, 6,8, 10 maddələri pozulub.  “Bəraət hökmü çıxarmayan məhkəməni mən məhkəmə saymıram”, — vəkil vurğulayıb.

Sonra vəkil Nemət Kərimli çıxış edib. O, müttəhimlərin konstitusion hüquq və azadlıqlarının pozulduğunu qeyd edib.

Aprelin 24-də vəkillərin çıxışları davam edəcək (Turan).