MTN tərəfindən keçirilmiş əməliyyat tədbirləri nəticəsində qaçaqmalçılıq yolu ilə İrandan Azərbaycana 36 kiloqram 500 qram narkotik vasitənin daşınmasının qarşısı alınıb. MTN İctimai Əlaqələr Mərkəzindən  yayılan açıqlamaya görə, Həsənov Eldar Qurban oğlu hazırda şəxsiyyəti istintaqla araşdırılan Rza adlı İran  vətəndaşı və qeyriləri ilə cinayət əlaqəsinə girərək qabaqcadan əlbir olan bir qrup şəxs halında satış məqsədilə külli miqdarda narkotik vasitəni İrandan qaçaq yolla, yəni  gömrük nəzarətindən gizli keçirərək Azərbaycana gətirmişlər. Məlum olmuşdur ki, 2013-cü il yanvarın əvvəllərində «Ağa» ləqəbli Rza adlı İran vətəndaşı külli miqdarda narkotik vasitə olan heroinin İrandan Azərbaycana gətirilməsini təşkil etmiş və Eldar Həsənova həmin narkotik vasitəni əvvəlcədən müəyyən edilmiş gizli yerdən götürüb Rusiyaya göndərməyi tapşırıb.

Eldar Həsənov da həmin narkotik vasitəni oradan götürərək başqa bir yerdə gizlədib. MTN-in əməliyyat tədbirləri nəticəsində Eldar Həsənov saxlanılıb, cinayət prosessual qanunvericiliyi ilə müəyyən edilmiş qaydada keçirilən baxış zamanı 25 kiloqram 600 qramdan artıq heroin aşkar edilərək götürülüb.

MTN tərəfindən həyata keçirilmiş daha bir əməliyyat tədbiri nəticəsində İrandan Azərbaycana qaçaq yolla narkotiklərin qanunsuz daşınması ilə məşğul olan Azərbaycan vətəndaşları — Əkbərov Tofiq Ağabala oğlu və Bağırov Zaur Abasəli oğlu saxlanılmışlar. Baxış zamanı təxminən 8 kiloqram 500 qram həşiş və 2 kiloqram 440 qramdan artıq tiryək aşkar edilərək götürülüb.

Faktlarla bağlı MTN İstintaq Baş İdarəsi tərəfindən CM-nin 206.4-cü (əvvəlcədən əlbir olan bir qrup şəxs tərəfindən narkotik vasitələrin qaçaqmalçılığı), 234.4.1 və 234.4.3-cü (əvvəlcədən əlbir olan bir qrup şəxs tərəfindən satış məqsədi ilə qanunsuz olaraq külli miqdarda narkotik vasitələri əldə etmə, saxlama, daşıma və satma) maddələri ilə cinayət işləri başlanılıb, Eldar Həsənov, Tofiq Əkbərov və Zaur Bağırov təqsirləndirilən şəxs qismində cəlb olunaraq barələrində məhkəmənin qərarı ilə həbs qətimkan tədbiri seçilib. Bu hüquqazidd əməllərin digər iştirakçılarının müəyyənləşdirilməsi üçün istintaq-əməliyyat tədbirləri davam etdirilir.