Sumqayıt Şəhər Məhkəməsində “İynə” satirik jurnalının həbsdə olan baş redaktoru Baloğlan Mirzəlinin cinayət işi üzrə məhkəmə prosesi başa çatıb. Məhkəmə onu təqsirli bilib. Mirzəlinin vəkili Anar Qasımlının APA-ya verdiyi məlumata görə, hökmə əsasən, Mirzəli 2 il sınaq müddəti təyin olunmaqla 3 il şərti müddətinə şərti azadlıqdan məhrum edilib. O, məhkəmə zalından sərbəst buraxılıb.

Mirzəli Sumqayıt Şəhər Polis İdarəsinin 4-cü bölməsinin əməkdaşları tərəfindən həbs olunub. O, 26 noyabr 2013-cü il tarixində izahat alınması üçün  bölməyə çağırılıb və 28 noyabr 2013-cü il tarixdə haqqında bir ay müddətində həbs-qətimkan tədbiri seçilib. Buna səbəb kimi onun Bakı-Sumqayıt şosesində yerləşən “Turac” kafesinin sahibindən rüşvət istəməsi göstərilib.

Mirzəli CM 182.1 (hədə-qorxu ilə tələb etmə) maddəsinə əsasən ittiham olunur.