Yanvarın 8-də Ağır Cinayətlərə dair İşlər üzrə Şəki Məhkəməsində İsmayıllı hadisələri üzrə prosesdə ReAl hərəkatının rəhbəri İlqar Məmmədov və Müsavat Partiyasının sədr müavini Tofiq Yaqublu ifadə veriblər. Onlar və digər 16 müttəhim 23-24 yanvar 2013-cü il tarixlərində İsmayıllı şəhərində kütləvi iğtişaşlar təşkil etməkdə və ya onlarda iştirakda ittiham olunurlar.

Məmmədov bildirib ki, İsmayıllıya vəziyyətlə yerində tanış olmaq və siyasi qiymət vermək  məqsədilə İsmayıllıya gəlib. O xatırladıb ki, 1 mart 2012-ci il Quba iğtişaşları zamanı da o, eyni məqsədlə həmin rayona səfər etmişdi.

Onun sözlərinə görə, hər iki hadisənin mənşəyi eynidir və hakimiyyətin böhranının təzahürü olub. Məmmədov ona qarşı irəli sürülmüş ittihamları “siyasi” adlandırıb və təkzib edib.

Öz növbəsində, Yaqublu bildirib ki, İsmayıllıya “Yeni Müsavat” qəzetinin nümayəndəsi olaraq reportaj hazırlamaq üçün gedib. O, cəmi 15 dəqiqə şəhərdə olub və rayondan qovularaq polislərin müşaiyəti ilə Bakıya göndərilib.

O, ittihamları “siyasi”, məhkəmə prosesini isə “şou” adlandırıb.

Yanvarın 9-da məhkəmə prosesi davam edəcək (Turan).