Prezident İlham Əliyev Nazirlər Kabinetinin 2014-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında Qərbin ikili standartlarını sərt tənqid edib. Hiss olunur ki, Qərbin açıq ikiüzlülüyü qarşısında  rəsmi Bakının əsəbləri son həddə qədər gərilib. Prezident deyib ki, Qərb ölkələrinin rəhbərləri Bakının xahişlərinə məhəl qoymurlar.

Bakı istəyib ki, onlar qondarma “Dağlıq Qarabağ Respublikası”nın “rəhbərləri”ni öz ölkələrinə buraxmasınlar, onlara qarşı sanksiyalar tətbiq edilsin lakin bunun bir nəticəsi olmayıb.

“Minlərlə Azərbaycan vətəndaşı həlak olub, bizə qarşı soyqırımı törədilib. Nəticə etibarilə Ermənistana qarşı heç bir sanksiya tətbiq edilmir. Nə üçün qondarma “Dağlıq Qarabağ Respublikası”nın rəhbərləri sanksiyalardan əziyyət çəkmir? Nə vaxta qədər biz bu ikili standartlarla üzləşəcəyik?” —  prezident Əliyev sual edir.

Dövlət başçısı bildirib ki, Azərbaycan beynəlxalq münasibətlərdə ikili standartlara qarşı öz etiraz səsimizi ucaldır: “Bizimlə əməkdaşlıq edən Qərb ölkələrinin rəhbərlərindən xahiş edirik ki, qondarma “Dağlıq Qarabağ Respublikası”nın “rəhbərləri”ni öz ölkələrinə buraxmasınlar, onlara qarşı sanksiyalar tətbiq edilsin. Qondarma “Dağlıq Qarabağ Respublikası”nın “rəhbərləri”ni Qərb ölkələrində qanunsuz telemarafonlar keçirir, pullar yığırlar. Sonra o pulları bizim əleyhimizə istifadə edirlər. Qondarma “Dağlıq Qarabağ Respublikası”nın “rəhbərləri”ni Qərbin aparıcı ölkələrində qəbul edirlər, vizalar verilir, onlar orada “nümayəndəliklər” açırlar, gedib-gəlirlər. Nə üçün? Hesab edirəm, vaxt gəlib çatıb ki, biz bu məsələ ilə bağlı fikrimizi daha da açıq şəkildə ifadə edək. Biz bu ikili standartlardan yorulmuşuq”.

Prezident Əliyev bu qədər ədalətsizliyə dözməyin mümkün olmadığını vurğulayıb:

“Nə üçün Avropa Şurası Parlament Assambleyasında Ermənistan nümayəndə heyətinin səlahiyyətlərini dayandırmaq məsələsi müzakirə edilmir?! Biz bu məsələni dəfələrlə qaldırmışıq. Yadımdadır ki, hələ 2001-ci ildə mən Azərbaycan Milli Məclisinin AŞPA-dakı nümayəndə heyətinin rəhbəri kimi dəfələrlə bu məsələni qaldırmışam. Buna heç kim heç bir reaksiya vermir. Deyirlər, gedin razılaşın, danışın, sülh yolu ilə həll edin bunu. Bizə qarşı etnik təmizləmə aparılıb, soyqırımı törədilib. Azərbaycanlılar Dağlıq Qarabağdan qovulandan sonra orada dırnaqarası referendum keçirilib. Hesab edilir ki, bu məqbuldur. Buna dözmək mümkün deyil. Bizə qarşı olan ədalətsizliyi faktlarla, dəlillərlə ifşa etməliyik. Hesab edirəm ki, bu prinsipial mövqe həm ədaləti bərpa edəcək, həm də riyakar siyasəti ifşa edəcək. Bizə qarşı riyakar siyasət, ikili standart siyasəti davam edir. Biz isə bununla heç vaxt barışmayacağıq. O ki, qaldı münaqişənin həllinə, heç kim üçün sirr deyil ki, bu gün dünyada əsas amil güc amilidir. Bu reallıqdır. Ona görə biz daha da güclü olmalıyıq və ilk növbədə hərbi gücümüzü artırmalıyıq”.