Həbs olunan Nida-çıların valideynləri aclıq aksiyasına başlayacaqlar. Onlar bu qərara gəldiklərini bu gün  keçirdikləri mətbuat konfransında bildiriblər. İttiham olunan Nida-çı Zaur Qurbanlının anası Səkinə Qurbanova çıxışında prokurorun gənclərə tez ittiham irəli sürməsinin gözlənilməz olduğunu bildirib. O, prokuroru Nida-çı gənclərə çox iş istəməkdə ittiham edib və gənclərə bəraət verilməsini istəyib.

Qurbanova qeyd edib ki, buna etiraz olaraq valideynlər aprelin 20-dən aclıq aksiyasına başlayacaqlar və həbs olunanlara bəraət verilənə qədər aksiya davam etdiriləcək. Rəşadət Axundovun atası Fikrət Axundov da aclıq aksiyasına başlayacaqlarını qeyd edib.

Sonda valideynlərdən 3-ü aprelin 20-dən aclıq aksiyasına başlamaq barədə qərar verib.

Vəkillər Namiq Hacıyev və Fariz Namazlı isə bu gün həbsdə olan Rəşadət Axundov, Şahin Novruzlu və Məmməd Əzizovla görüşüblər.

Hacıyev APA-ya bildirib ki, təqsirləndirilən şəxslərin dünəndən başladıqları aclıq aksiyası davam edir. Hacıyev bildirib ki, təqsirləndirilən şəxslərin cərimə kamerasına salınmaları barədə yayılan məlumatlar isə həqiqəti əks etdirmir: “Biz bu məsələni də soruşduq. Onlardan heç kim cərimə kamerasına salınmayıb ”. Penitensiar Xidmətin ictimaiyyətlə əlaqələr şöbəsindən isə APA-ya bildiriblər ki, təqsirləndirilən şəxslərin aclıq aksiyasına başlamaları barədə məlumatlar həqiqəti əks etdirmir.

Xatırladaq ki, ötən gün hakim Cavid Hüseynovun sədrliyi ilə keçirilən prosesdə dövlət ittihamçısı təqsirləndirilən şəxslərə cəza istəyib. Prokuror məhkəmədən Zaur Qurbanlı, İlkin Rüstəmzadə və Rəşadət Axundovun 8 il 6 ay, Rəşad Həsənov, Bəxtiyar Quliyev və Məmməd Əzizovun 8 il, Üzeyir Məmmədlinin 7 il 6 ay, Şahin Novruzlunun 6 il 6 ay müddətinə azadlıqdan məhrumetmə cəzasına məhkum edilməsini istəyib.