Dünən Heydər Əliyev Mərkəzində gürcü kino və teatr ulduzlarının iştirakı ilə “Vera məhəlləsinin musiqiləri” (“Melodies of Vera District”) müzikli Azərbaycan tamaşaçılarına təqdim olunub. Müzikldə  məşhur kino aktyoru və mhnı ifaçısı  Vaxtanq Kikabidze, tanınmış sənət adamlarından Sofiya Nijaradze, Nodiko Tatişvili, Stefan Ketato, eləcə də Z.Paliaşvili adına Gürcüstan Dövlət Opera və Balet Teatrının, İ.Suxişvili adına Gürcüstan Xalq Rəqsləri Ansamblının solistləri çıxış ediblər.

1973-cü ildə Georgi Şenqelayanın quruluşunda lentə alınmış, musiqili komediya janrında çəkilən “Vera məhəlləsinin musiqiləri” bədii filmi Gürcüstan və onun hüdudlarından kənarda böyük şöhrət qazanıb. Bu filmin motivləri əsasında hazırlanan müziklə isə fransız rejissoru və xoreoqrafı Reda Bentifora quruluş verib.

Dramaturgiya, musiqi, ifaçılıq sənəti, xoreoqrafiya və xüsusi effektlərin bir-biri ilə mükəmməl vəhdət təşkil etdiyi səhnə əsərini Bakı izləyiciləri anşlaqla qarşılamışlar.

Sonda Vaxtanq Kikabidze, tanınmış sənət adamı Sofiya Nijaradze çıxış edərək Azərbaycanı, başkənd Bakını çox sevdiklərini bildiriblər.