Ölkədə saxta əskinaslar kəsmək deyəsən geniş şəkil almaqdadır. Budur,  bu dəfə də Ağdaş rayon sakinindən saxta əsginaslar götürülüb. DİN saytına istinadən, Baş Mütəşəkkil Cinayətkarlıqla Mübarizə İdarəsi əməkdaşlarının  əməliyyat-axtarış tədbirləri nəticəsində Qaradağ rayonu Sahil qəsəbəsinin ərazisində Ağdaş rayon sakini Sadiq Yusibovdan 8 ədəd 20 manatlıq, 4 ədəd 10 manatlıq, Hacıqabul rayon sakini Raqil Şirəliyevdən 1 ədəd 20 manatlıq, 1 ədəd 10 manatlıq saxta əskinaslar götürülüb.

Şirəliyevin idarə etdiyi Kia-Rio markalı avtomobilə baxış zamanı oradan 4 ədəd 20 manatlıq, 2 ədəd 10 manatlıq saxta əskinaslar aşkar edilərək götürülüb. Şirvan şəhərinin ərazisində Şirəliyevin icarəyə götürdüyü Foto Uğur studiyasına baxış zamanı isə saxta əskinasların çap edildiyi skaner-printer, video-çəkiliş qeydlərinin aparıldığı DVR sistem bloku aşkar edilərək götürülüb. Cinayət işinin başlandığı bildirilir.