Qarabağ Azadlıq Təşkilatı (QAT) Ermənistana göstərdiyi hərbi yardıma etiraz olaraq Çin Xalq Respublikasının sədri Si Tszinpiyə məktub göndərib.

QAT mətbuat xidməti bildirir ki, məktubda Çinin Ermənistana hərbi yardım göstərməsinə etiraz bildirilib: «Mətbuatda gedən məlumatlara görə, ölkənizin müdafiə naziri Çan Vantsuyan işğalçı Ermənistanın müdafiə naziri Seyran Ohanyanla Pekin şəhərində görüşüb, hərbi əməkdaşlıq məsələləri ilə bağlı müzakirələr aparılıb. İşğalçı Ermənistana ildə 5 mln. yuan həcmində hərbi yardım göstərilməsi ilə bağlı saziş imzalanıb. Çin BMT Təhlükəsizlik Şurasının beş daimi üzvündən biri olduğuna, BMT Təhlükəsizlik Şurasının Ermənistan tərəfindən Azərbaycan torpaqlarının işğal edilməsinə dair 4 qətnaməsinə səs verdiyinə görə əlavə beynəlxalq öhdəliklərin daşıyıcısıdır. Ona görə də dövlətinizin işğalçı Ermənistana bu cür münasibəti ciddi narahatlıq doğurur. Xahiş edirik bu məsələyə diqqətlə yanaşasınız və yanlışlığın aradan qaldırılması üçün siyasi iradə nümayiş etdirəsiniz».

 QAT-ın məktubu Çinin Azərbaycan səfirliyinə təqdim olunub.