Bakının Yasamal rayonu ərazisində zəncirvari yol qəzası baş verib. Bu KİA elə bərk gedirmiş ki…  Nəticədə Cəfər Cabbarlı küçəsində 6 avtomobil toqquşub. «5 mərtəbə» dairəsi istiqamətində yüksək sürətlə hərəkət edən KİA  markalı avtomobil əvvəlcə Toyotaya dəyib, daha sonra isə yolun hərəkət hissəsinin əks istiqamətinə çıxaraq qarşıdan gələn Seat markalı avtomobilə çırpılıb.

Zərbənin gücündən Seat onunla eyni istiqamətdə hərəkət edən BMW, Mercedes və Daeweooya dəyib.

Yol Patrul Xidməti əməkdaşları deyiblər ki, qəza nəticəsində 2 nəfər xəsarət alıb. Bunlar 27 yaşlı Osmanlı Təranə Azad qızı və 26 yaşlı Hüseynova Səbinə Əli qızıdır. Hər iki xəsarət alanın sərnişin olduğu bildirilir. Yaralılar Şəhər Kliniki Xəstəxanasına çatdırılıblar.

İlkin bilgiyə görə, qəzaya Toyota-nın KİA-nı  yolun əks istiqamətinə sıxması səbəb olub. Hadisənin dəqiq səbəbi avtotexniki ekspertizanın rəyindən sonra məlum olacaq.

Qəzadan sonra avtomobillərin yolun hərəkət hissəsini bağlaması nəticəsində Cəfər Cabbarlı küçəsində uzun tıxac yaranıb.

Faktla bağlı Yasamal rayon Polis İdarəsində araşdırma aparılır.