Türkiyənin Almaniya səfirliyində çalışan iki diplomatın avtomobili yandırılıb. İstanbulun NTV telekanalına istinadən,  olay yanvarın 1-də gecə saat 23:30 radələrində baş vermişdir. Berlinin Mitte rayonunda  Henrix Hayne prospektində bir-birindən 1 km aralıda parklanmış  avtomobillərin üzərinə ön tərəfdən  tezalışan maddə tökülüb və qəsdən yandırılıb. Məhəllə sakinləri yanan avtomobilləri görərək yanğınsöndürənlərə xəbər veriblər. Yanğın söndürülsə də, hər iki avtomobil yararsız vəziyyətə düşüb.

Türkiyə səfirliyi Almaniya rəsmilərindən olayın araşdırılmasını və təqsirkarların yaxalanmasını istəyib. Eyni zamanda, səfirliyin təhlükəsizliyinin qorunmasına diqqətin artırılması da tələb olunub. Almaniya polisi olayla bağlı araşdırmaya başlayıb.