Azərbaycan Sahibkarlar (İşəgötürənlər) Təşkilatları Milli Konfederasiyası  (ASK)  Four Seasons otelində  azərbaycanlı sahibkarlarla italyan iş adamlarının  görüşünü keçirib. Görüşdə italyan iş adamları ilə yanaşı,   əsasən tikinti, inşaat, mebel, topdan və pərakəndə satış,  turizm və sənaye  sektorlarında fəaliyyət göstərən 50-yə yaxın azərbaycanlı iş adamı iştirak edib.

Tədbiri giriş sözü ilə açan ASK prezidenti Məmməd Musayev qonaqları salamlayaraq bildirib ki, İtaliyanın  məhşur “MADE S.p.A.” şirkətinin əməkdaşları ilə  Azərbaycan sahibkarlarının bu günki görüşü hər iki ölkənin işgüzar əlaqələrinini inkişafında  mühüm əhəmiyyət kəsb edir. Musayev qeyd edib ki, “MADE S.p.A.” şirkəti 40 ildən artıq mülki, sənaye və   kommersiya obyektlərinin tikintisində geniş təcrübəsi olan qurumdur. Şirkət binaların, o cümlədən memarlıq özəlliyi olan abidələrin bərpası, rekonstruksiyası, habelə yolların, avtobanların salınması, hidrotexniki qurğuların tikintisi üzrə dünyada tanınmışdır.

Musayev daha sonra Azərbaycan –İtaliya arasında mövcud iqtisadi vəziyyətlə bağlı ətraflı məlumat verib. Qeyd edib ki, Azərbaycan ı Sahibkarlar Konfederasiyasının təşəbbüs və təşkilatçılığı ilə dəfələrlə Azərbaycan və İtaliya  iş adamlarının görüşləri keçirilmiş, bu görüşlərdə tikinti-inşaat, memarlıq, mebel istehsalı, enerji sistemləri, turizm kimi mühüm məsələlər üzrə əməkdaşlıq  və investisiya məsələləri müzakirə  olunub.

Daha sonra ASK nəzdində fəaliyyət göstərən “ASK Biznes Konsaltinq” MMC-nin  təqdimatı  keçirilib.  Bildirilib ki,  18.10.2013 tarixində qeydiyyatdan keçən “ASK Biznes Konsaltinq” MMC  hazırda İtaliya, İspaniya, Moldova, Türkiyə və s. ölkələrdəki tərəfdaş təşkilatlarla perspektiv əməkdaşlıq müqavilələri bağlanmışdır. Onun  əsas fəaliyyəti biznes forumlar, sərgilər, B2B görüşlərinin təşkil edilməsindən, yerli və xarici sahibkarlar arasında konkret biznes-layihələrin reallaşmasından, biznes əlaqələrin qurulmasından, promotion fəaliyyətinin həyata keçirilməsindən, strateji biznes planlaşdırma, hüquqi və digər konsaltinq xidmətlərinin təqdim edilməsindən ibarətdir. İtalyan iş adamları ilə təşkil edilən bu  görüş də “ASK Biznes Konsaltinq”in  imza atdığı əməkdaşlıq müqaviləsinin bəhrəsdir.

İtaliyada  tikinti, tarixi abidələrin bərpası üzrə fəaliyyət  göstərən “Made Florence” Səhmdar Cəmiyyətinin  Baş İcraçı Direktoru və prezidenti Giuseppe Massascusa bildirib ki, uzun müddətdir  onlar Azərbaycanla əməkdaşlıq edirlər. Bu əlaqələr  sayəsində  hər iki ölkə arasında musiqi sahəsi üzrə  münasibətlər daha da dərinləşmiş, nəticədə Florensiya və Bakıda ötən aylarda bir neçə konsertlər təşkil olunmuşdur. Bu zaman italyan və azərbaycanlı musiqiçiləri  ilk dəfə UNESCO-nun qeyri-maddi mədəniyyəti siyahısına daxil edilmiş  Azərbaycan muğamını  birgə ifa ediblər. Giuseppe Massascusa onu da deyib ki, Azərbaycanın iş dünyasını təmsil edən Azərbaycan Respublikası Sahibkarlar  (İşəgötürənlər) Təşkilatları Milli Konfederasiyası ilə   birgə biznes  fəaliyyəti  qurmaq,  Azərbaycan kimi  inkişaf etməkdə  olan ölkə ilə  əməkdaşlıq etmək  onlar üçün  böyük şərəfdir və bu əməkdaşlıq Azərbaycan və İtaliya qarşılıqlı  əlaqələrinə təkan verəcək.

Beghelli Qrupun Prezidenti Can Pietro Beghelli isə  sonra qeyd edib ki, rəhbərlik etdiyi şirkət haqqında tədbir iştirakçılarını məlumat verib. Beghelli Qrup enerjiyə qənaət etməklə bütün hallarda  işıqlandırma, ev elektronikası, sənaye və yaşayış məntəqələrində təhlükəsizlik və mühafizə sistemləri və fotovoltaik sistemlər sahəsində fəaliyyət göstərən İtalyan şirkətidir. Onun real imkanları  Almaniya, ABŞ, Kanada, Çexiya Respublikası, Meksika, Çin və Honkonqdakı filialları tərəfindən təmsil olunur. Beghellinin məhsulları dünyanın 60  ölkəsində satılır.

Tədbir iki ölkənin iş adamları arasında əlaqələrin inkişafına, birgə layihələrin həyata keçirilməsinə, ticarət əlaqələrinin genişləndirilməsinə dair ikitərəfli görüşlərlə başa çatmışdır.