Azərbaycanla Türkiyə arasında ticarət əlaqələri sürətlə inkişaf etməkdədir və yaxın illərdə bu rəqəmin 10 mlrd. dollara çatdırılması planlaşdırılır. Bu proqnozu Gəncədə “Regional inkişaf: strateji hədəflər və perspektivlər” adlı beynəlxalq elmi-praktik konfransda iştirak edən Türkiyənin iqtisadi inkişaf nazirinin müavini Mehmed Ceylan jurnalistlərə açıqlamasında bildirib.

Onun sözlərinə görə, Azərbaycan Türkiyədə investisiya qoyaraq bir sıra önəmli və böyük layihələr həyata keçirir: “Azərbaycanla Türkiyə arasında işbirliyinin hansı səviyyədə olduğunu görmək üçün bir dəfəyə 5 mlrd. dollarlıq sərmayə ilə tikilən Neft Emalı Zavodunu misal çəkə bilərik”.

Ceylan türkiyəli iş adamlarının Azərbaycanda böyük layihələr həyata keçirməkdə maraqlı olduqlarını bildirib. Onun sözlərinə görə, dünyada 8-ci, Avropada isə 2-ci yerdə olan Türkiyənin metal sənayesi üzrə iş adamları Azərbaycanda, xüsusən metal yataqları olan qərb bölgəsində investisiya yatıraraq layihələr həyata keçirə bilərlər.