Xalq rəssamı Toğrul Nərimanbəyov gələn həftənin əvvəllərində Parisin Passi məzarlığında torpağa tapşırılacaq. Bu barədə rəssamın həyat yoldaşı, Parisdə yaşayan Sevil Nərimanbəyova xəbər verir. Artıq Paris merindən dəfnlə bağlı müvafiq icazə alınıb.

Sevil Nərimanbəyova vəkilinin dəfnə hazırlıq işləri ilə məşğul olduğunu, mərasimin çox güman gələn həftənin əvvəllərində olacağını deyib: “Toğrul Nərimanbəyov sağ ikən bu yeri çox sevir və Passi məzarlığında dəfn olunmaq istəyirdi. Paris merinin ərimi Passi məzarlığında dəfn etməyə razılıq verməsinə çox məmnun oldum. İndi mən müəyyən mənada hətta Toğrulun qızına da minnətdaram. Çünki o məni məhkəməyə verməklə, böhtan atmaqla prosesi uzatdı və mən bu müddət ərzində Paris merindən ərimi arzusunda olduğu yerdə dəfn etməyə icazə ala bildim”.

Passi məzarlığının əsası 1820-ci ildə qoyulub, bu məzarlıq Parisin mərkəzində, Sena çayının sağ sahilində, Yelisey meydanında yerləşir. Burada tanınmış siyasətçilər, mədəniyyət isimləri, o cümlədən tanınmış rəssam Eduard Mane, rəssam Bert Morissoo, bəstəkar Klod Debüssi, bəstəkar Qabrile Fore, İran şahının qızı Leyla Pəhləvi və digərləri dəfn olunublar.

SSRİ və Azərbaycan Respublikasının dövlət mükafatları laureatı, SSRİ və Azərbaycanın xalq rəssamı, Azərbaycan prezidentinin fərdi təqaüdçüsü, 83 yaşlı Toğrul Fərman oğlu Nərimanbəyov iyunun 7-də vəfat edib. Mərhumun ikinci həyat yoldaşı onun Fransada dəfn edilməsini istəyib. Lakin T. Nərimanbəyovun qızı Əsmər Nərimanbəyova buna qarşı çıxıb. O, atasının Azərbaycanda dəfn olunması tələb edib və Fransa məhkəməsində bununla bağlı iddia qaldırıb. Məhkəmə mərhumun Fransada dəfn olunması barədə qərar çıxarıb. Qərardan verilən apellyasiya şikayəti isə təmin olunmayıb.