İqtisadiyyat və Sülh İnstitutu Merilend Universiteti ilə birgə hazırladığı dünya ölkələrinin terror təhlükəsi reytinqini açıqlayıb. 158 ölkəni əhatə edən reytinqdə Azərbaycan terror təhlükəsi səviyyəsinə görə 81-ci yerdə qərarlaşıb.

“Terror təhlükəsi indeksi” 4 kriteriya (2012-ci ildə həyata keçirilən terror aktları, maddi zərər, ölən və zərərçəkənlərin sayı) üzrə müəyyənləşdirilib.

Siyahıda lider ölkə İraqdır. Ötən il bu ölkədə 1228 terror aktı töprədilib, nəticədə 1798 nəfər ölüb, 4905 nəfər yaralanıb. Maraqlıdır ki, İraqda terror aktına iştiraka görə ölüm cəzası qüvvədədir.

İkinci yerdə Pakistan gəlir. 2012-ci ildə bu ölkədə 910 terror hadisəsi baş verib, 1468 nəfər ölüb, 2459 nəfər yaralanıb.

İlk üçlüyü Əfqanıstan tamamlayır – 364 terror aktı, 1293 ölü, 1882 yaralı.

İlk onluqda Hindistan, Yəmən, Somali, Nigeriya, Tailand, Rusiya və Filippin də var. Türkiyə 19-cu, Ermənistan 97-ci yerdədir (bu ölkə özü terrora rəvac verməsə kimin onda işi var?).

Son onillikdə cəmi 31 ölkədə terror aktı baş verməyib. Avropada terror aktlarının sayı azalsa da, bu hadisələr zamanı ölənlərin sayı ABŞ-ın göstəricisini 19 dəfə üstələyir.