Təbriz Azad Universitetinin Sosiologiya fakültəsinin tələbəsi Əmir Çəməni barəsində çıxarılmış 40 şallaq cəzası hökmü icra edilib. Bu azərbaycanlı tələbə İran prezidentini təhqir etməkdə günahlandırılıb. Qərar iyunun 5-də icra edilsə də, xəbər yenicə yayılıb.

Əmir Çəməni 2012-ci il Təbriz İnqilab Məhkəməsinin birinci şöbəsinin hakimi Rəhim Həmlbər tərəfindən İranın ali dini liderini təhqir etməkdə (6 ay), hakimiyyətə qarşı təbliğat aparmaqda (3 ay) günahlandırılaraq 9 ay azadlıqdan məhrum edilib. Eyni zamanda azərbaycanlı tələbə İran prezidentini təhqir etməkdə ittiham olunaraq 40 şallaq cəzasına məhkum edilib. Əmir Çəməni 2013-cü il yanvarın 13-də həbs edilərək 9 aylıq həbs cəzasını çəkmək üçün Təbriz həbsxanasına salınıb. Hazırda azərbaycanlı tələbə 5 aydır həbsdədir.