Azərbaycan Sahibkarlar Konfederasiyasında (ASK) kadr dəyişikliyi aparılıb.  ASK-dan bildirilir ki, Konfederasiyanın baş katibi  Məhəmmədəli Əmir oğlu Əfəndiyevin başqa işə keçməsi ilə əlaqədar, bu vəzifəyə Natəvan Adil qızı Məmmədova təyin olunub. Məmmədova 1974-cü ildə Ağdaş rayonunda doğulub, 1995-ci ildə Dillər Universitetini ingilis dili fakültəsi üzrə bitirib, 2007-ci ildə Azərbaycan Dövlət İqtisad Universitetində iqtisadiyyat üzrə, 2012-ci ildə isə Corc Vaşinqton Universitetində layihə idarəetməsi üzrə magistr dərəcəsinə yiyələnib. Bundan başqa, o, 2000–2003-cü illərdə Azərbaycan Dövlət Dillər Universiteti və Bakı Slavyan Universitetində ingilis dili müəllimi işləyib.

2003-2007-ci illərdə Maliyyə Nazirliyində kollegiyanın katibi və Nazirlik yanında Maliyyə Elm Tədris Mərkəzində baş müəllim vəzifələrində çalışıb. 2007-2010-cu illərdə Dünya Bankının Azərbaycandakı ölkə ofisində, yoxsulluğun azaldılması və iqtisadi idarəetmə sektorunda tədqiqatçı analitik vəzifəsində çalışıb. 2010-cu ildə Azərbaycan Mərkəzi Bankı İnkişaf Departamentinin resurslar və xüsusi layihələri şöbəsinin rəisi, 2012-ci ildə isə sözügedən Departamentinin direktor müavini vəzifəsinə təyin edilib. Ailəlidir, iki övladı var