Eurovision təmsilçimiz Sabina Babayeva yeni klip çəkdirib. Vaxtilə «Karvan» qrupunun ifa etdiyi «Azərbaycanım» adlı vətənpərvər mahnını yenidən gündəmə gətirən Sabina AYNAya açıqlamasında artıq çəkilişlərin bitdiyini və klipin yaxın zamanlarda təqdim olunacağını söyləyir.
Qeyd edək ki, klip Gənclər və İdman Nazirliyinin birbaşa dəstəyi ilə ekranlaşdırılıb. Klipin çəkilişləri isə Bakı Media Mərkəzinin mükəmməl texniki bazasında rejissor Vuqar İslamzadə tərəfindən aparılır. 3D qrafikanın istifadə olunacağı klipin çəkilişlərində sənətçinin imicinin üzərində modelyer Günel Behbudova və visajist Kristina çalışıb. Bundan başqa, klipin 3D rəssamları Riyad Qasımov, Vüqar Cəlilov, operatoru Zaur Seyidov, montajçısı isə Fuad Quliyevdir. Hələlik sosial şəbəkədəki rəsmi səhifəsində çəkimlərdən bir neçə foto paylaşan Sabina Babayeva
«Azərbaycanım»ın oktyabrın sonunda təqdim olunacağını deyir.