Bakının «Rabitə» voleybol klubu Çempionlar Liqasında növbəti oyununda «Sərhədçi» Olimpiya Mərkəzində Fransanın «Kann» komandasını qəbul edib. Oyun hazırda əla forma yığan Marçello Abbondanzanın komandasının tam üstünlüyü şəraitində keçib. İlk matçda 3:1 hesabı ilə qalib gələn «Rabitə» doğma divarlar arasında rəqibə heç 1 set də güzəştə getməyib — 3:0.
Nəticədə «Rabitə» Çempionlar Liqasının 1/3 finalına «Azərreyl»dən sonra yüksələn ikinci Bakı klubu olub. Onlar yarımfinal uğrunda Kazan «Dinamo»su ilə oynayacaqlar. İlk görüş fevralın 5-7-də Rusiyada, cavab qarşılaşması 1 həftə sonra ölkəmizdə olacaq.
Çempionlar Liqası
I pley-off mərhələsi, cavab oyunu
24 yanvar
«Rabitə» (Azərbaycan) -«Kann» (Fransa) — 3:0 (25:19; 25:18; 25:17)
İlk oyun
«Kann» (Fransa) — «Rabitə» (Azərbaycan) — 1:3 (17:25, 25:15, 19:25, 19:25)
Qeyd edək ki, «Azərreyl»in növbəti mərhələdə rəqibi «Yamamay» (İtaliya) — «Sveriner» (Almaniya) görüşündən sonra bilinəcəkdi. İlk matçda ikincilər 3:2 hesabı ilə qalib gəliblər.
Dünən qadın voleybolçular arasında Çempionlar Liqasının 1/3 finalçılarının hamısı məlum olub. Apasport.az saytının məlumatına görə, 1/6 final mərhələsində sensasiya qeydə alınmayıb. Gözlənilən kimi, favoritlər mərhələ adlayıb. Onlar arasında Azərbaycanla Türkiyənin hərəyə 2, İtaliya və Rusiyanın 1 klubu yer alıb.
İlk oyunlar fevralın 5-7-də, cavab oyunları bir həftə sonra olacaq.
«Dinamo» (Kazan, Rusiya) — «Rabitə» (Azərbaycan)
«Vakifbank» (Türkiyə) — «Əczaçibaşi» (Türkiyə)
«Yamamay» (İtaliya) — «Azərreyl» (Azərbaycan)
Qeyd edək ki, «Dördlər finalı» martın 15-17-də İstanbulda olacaq. Yarışın ev sahibi «Qalatasaray» isə yarımfinalda rəqibini gözləyir.