Qızıl payız — Bakının caz vaxtı…
“Euronews” Beynəlxalq Bakı Caz Festivalı barədə yazır və deyir ki, payız Azərbaycanın paytaxtı Bakıda caz vaxtıdır. Beynəlxalq Bakı Caz Festivalı haqqında məqaləsində Avropanın nüfuzlu telekanalı «Euronews»un saytı onu da yazır ki, hər il Azərbaycanın Mədəniyyət və Turizm Nazirliyi Beynəlxalq Bakı Caz Festivalı təşkil edir. Bu ilki caz festivalı bir çox məşhurların iştirakı ilə yadda qalıb. Onların sırasında məşhur amerikalı saksafonçu Coşua Redman və onun kvarteti, həmçinin «Qremmi» mükafatına layiq görülmüş saksafonçu Kenni Qarret də yer alıb.
Bu il keçirilən caz festivalında, həmçinin məşhur fransız aktyoru Jerar Depardye də iştirak edib.
Fransız aktyor Beynəlxalq Bakı Caz Festivalına gəlişi barədə danışarkən bildirib: «Azərbaycan mənim sevdiyim bir ölkədir. Burada mənim çox sayda dostlarım, həmçinin musiqiçi dostlarım var və bu səbəbdən Beynəlxalq Bakı Caz Festivalı çox önəmlidir».
Məqalədə, həmçinin Azərbaycanın tanınmış caz musiqiçiləri Mircavad Cəfərov, Elbəy Məmmədzadə və digərləri barədə də məlumat öz əksini tapır.
Builki Beynəlxalq Bakı Caz Festivalında iştirak edən «Euronews»un müxbiri Volfqanq Spindler də öz təəssüratlarını bölüşüb: «Bakı Caz Festivalı ölkənin caz istedadını kəşf etmək üçün əla fürsətdir».
Qeyd edək ki, 23 oktyabr-2 noyabrda Bakıda Mədəniyyət və Turizm Nazirliyi və Azərbaycan Mədəniyyət Fondunun təşkilatçılığı ilə Beynəlxalq Caz Festivalı keçirilib.