Ermənilər işğal altındakı Azərbaycan ərazilərində təbii yeraltı sərvətlərin talanmasını genişləndirir, Bakı isə susub dinmir. “DQR”in geoloji xidmətinin rəisi Qriqori Qabrielyan “NEWS.am”a açıqlamasında bildirib ki, rəhbərlik etdiyi qurumun məqsədi “DQR”in mis ehtiyatlarını 1 mln tona çatdırmaqdır.

Onun sözlərinə görə, mis yataqlarının kəşfiyyatı hazırda 4 zonada həyata keçirilir. Birinci zona Ağdam rayonundakı Xaçınçay su anbarından Ağdərə rayonu ərazisində ermənilərin “Kaşen” adlandırdıqları Dəmirli yatağınadək olan ərazini əhatə edir. Bu iri qızıl-mis-molibden yatağının kəşfiyyatını (Dəmirli yatağında isə artıq istismarını) “Valleks” şirkətlər qrupuna daxil olan “Beyz Metals” QSC-i həyata keçirir. Separatçı rejimin qondarma “geoloji xidməti”nin rəhbəri Qriqori Qabrielyan bildirib ki, Dəmirli (erməni versiyasında “Kaşen”) yatağında 2012-ci ildə mis filizinin ehtiyatları 56 mln ton müəyyən edilib. İstehsalat həcmi tam gücə çatdırıldıqdan sonra 14-15 min ton mis tərkibli filizin illik hasilatı 3,5 mln ton təşkil edəcəyi gözlənilir. Yatağın istismar müddəti isə 15 il müəyyən edilib.

İkinci zona Kəlbəcər və Laçın rayonları sərhədində yerləşən Dəlidağın ətrafını əhatə edir. “Burada bizim geoloji xidmətin həyata keçirdiyi kəşfiyyat çox yaxşı nəticə verib”, deyə Qriqori Qabrielyan bildirib.

Dağlıq Qarabağdakı işğalçı rejim mis yataqlarının axtarışını həmçinin işğal altında olan Zəngilan yaxınlığında və Laçından Şəlvə çayınadək ərazidə də həyata keçirir. “Bu rayon da bizim üçün xüsusi maraq kəsb edir”, deyə Qabrielyan bildirib.

“Respublikanın iqtisadi inkişafına əhəmiyyətli dərəcədə təsir edə biləcək əsas mineral xammalın tədqiqi — bizim xidmətin strateji vəzifələrindən biridir. Bu cür xammala biz məhz misi aid edirik. Bu səbəbdən biz bütün gücümüzü əvvəldən məlum olan mis yataqlarının, habelə özümüz aşkar etdiyimiz yataqların tədqiqinə cəlb etmişik”, deyə Qabrielyan əlavə edib.

Qeyd edək ki, erməni işğalınadək Azərbaycanın Qarabağ bölgəsində Ağdərənin Qızılbulaq (erməni versiyasında “Drmbon”) Dəmirli yataqlarından başqa 15-dən çox mis-qızıl yataqları kəşf olunmuşdu.