Nyu–Yorkda Xəzər Forumu keçiriklib və yenə də Forumun əsas mövzusu Avropanın enerji təhlükəsizliyində Cənubi Qaz Dəhlizinin rolu olub. Xəzər Strateji İnstitutu (HASEN) tərəfindən təşkil olunan tədbirdə Azərbaycandan dövlət rəsmiləri, diplomatlar, millət vəkilləri, media rəhbərləri, çoxlu sayda xarici ekspert və media nümayəndəsi iştirak edib. Tədbirin müzakirə mövzusu Cənub Qaz Dəhlizi, bu dəhlizin Avropanın enerji təhlükəsizliyində iştirakı ilə bağlı məsələlər olub,
deyə APAnın xəbərində deyilir.

Xəzər Strateji İnstitutunun baş katibi Haldun Yavaş tədbirlə bağlı danışarkən İstanbulda birinci Xəzər forumunu xatırladıb, bu il keçirilən forumun məqsədinin regionun enerji təhlükəsizliyinin müzakirə edilməsi olduğunu vurğulayıb.

Forumun əsas tərəfdaşı olan Azərbaycan Respublikası Dövlət Neft Şirkətinin vitse-prezidenti Elşad Nəsirov da Azərbaycanın enerji layihələrindən, özəlliklə sonuncu TANAP layihəsindən danışıb.

BP şirkətinin “Şahdəniz” layihəsi üzrə vitse-prezidenti Alasdair Kook da çıxışını Azərbaycanın regionun enerji təhlükəsizliyində xüsusi rolunu vurğulayıb.

Daha sonra Albaniyanın xarici işlər naziri Ditmir Buşati, Bosniya və Herseqovina XİN rəhbəri Zlatko Laqumdjia və Makedoniya xarici işlər naziri Nikola Poposki çıxış edib. Onlar da Azərbaycanın regionun enerji təminatındakı rolundan bəhs edib.

Daha sonra «Avropanın enerji təhlükəsizliyindəki məsuliyyət: Cənub Qaz Dəhlizi» mövzusunda panel keçirilib.

Paneldə Azərbaycan, Türkiyə və Gürcüstanın xarici işlər nazirləri Elmar Məmmədyarov, Əhməd Davudoğlu və xanım Maya Pancikidze çıxış edib. Nazirlər çıxışlardan sonra jurnalistlərin suallarını da cavablandırıb. Paneldə həmçinin ABŞ Dövlət Departamentinin təmsilçisi Karlos Pasqual və Avropa Birliyinin təmsilçisi Patrisia Flor çıxış edib.

Xəzər Forumu Xəzər dənizi bölgəsinin iqtisadi, siyasi və strateji potensialını öyrənmək, iş birliyi və ortaqlıq sahələrini müəyyən etmək üçün hazırlanan bir platformadır. Forum bütün dünya birliyində akademik, siyasət və iş dünyasının təmsilçilərini bir araya gətirir.