Gənc Tamaşaçılar Teatrınn aktrisası Naibə Allahverdiyeva inadından vaz keçib nəhayət seriallardan birində çəkilmək dəvətini qəbul edib. Bu, yenicə istehsalı başlayan “Vaxtsız əsən ruzigar” serialıdır. Aktrisanın bildirdiyinə görə, filmdə ana rolunu ifa edəcək: “Əslində dəvəti qəbul etməyimə səbəb tamaşaçıların sözü oldu. Kim məni görürsə, eyni sualı verir – niyə seriala çəkilmirsiniz? Mən də hamıya səbəbini izah edə bilmirəm, əlbəttə. Bu seriala dəvət gələndə çəkilmək qərarı verdim. Artıq bir seriya çəkilib. Mən ana rolundayam. Ümid edirəm ki, bu işim davamlı olacaq. Çünki bir serialda da çəkilirdim. Sonra anlaşılmazlıq oldu, ordan çıxdım”.
Teatrdakı işindən danışan N.Allahverdiyeva bildirib ki, hazırda Ağalar İdrisoğlunun quruluş verdiyi “Əkiz qardaşlar” tamaşasında məşğuldur. Yubileyi ilə əlaqədar olaraq isə Firuz Mustafanın “Müqəvva” monotamaşasını oynayacaq. Artıq stolüstü məşqləri başlayan tamaşanın quruluşçu rejissoru Ağalar İdrisoğludur. “Müqəvva”nın premyerası apreldə planlaşdırılır.