MTN tərəfindən son günlərdə həyata keçirilmiş əməliyyatlar nəticəsində İrandan uyuşdurucu qaçaqmalçılığı ilə məşğul olan şəxslər ifşa edilib. Onlardan ümumilikdə 15 kiloqram 400 qramdan artıq narkotik vasitə aşkar edilərək götürülüb.
MTN-in İctimai Əlaqələr Mərkəzinin yaydığı məlumatda bildirilir ki, əməliyyatın gedişində Azərbaycan vətəndaşı Samid Tağıyev saxlanılıb və müəyyən edilib ki, o, habelə hazırda şəxsiyyəti istintaqla araşdırılan İran vətəndaşı Şahin və qeyriləri cinayət əlaqəsinə girərək qabaqcadan əlbir olan bir qrup şəxs halında satış məqsədi ilə 1 kiloqram 142,97 qram narkotik vasitə olan heroini İran istiqamətindən gömrük sərhədindən gömrük nəzarətindən kənar keçirərək Azərbaycana gətiriblər.
MTN-in digər əməliyyat tədbiri nəticəsində Azərbaycan vətəndaşı Həsənağa Hüseynov yaxalanıb. Müəyyən edilib ki, Həsənağa Hüseynov və hazırda şəxsiyyəti istintaqla araşdırılan İran vətəndaşı, «Molla» ləqəbli Bayram adlı vətəndaşı cinayət əlaqəsinə girərək qabaqcadan əlbir olan bir qrup şəxs halında satış məqsədilə İran istiqamətindən narkotik vasitə olan — 7 kiloqram 038,53 qram həşişi və 495,55 qram heroini qaçaq yolla gizli keçirib Azərbaycana gətiriblər.
Daha bir əməliyyatda Azərbaycan vətəndaşı Habil Əliyev oğlu saxlanılıb. Məlum olub ki, Habil Əliyev və hazırda şəxsiyyətləri istintaqla araşdırılan İran vətəndaşları cinayət əlaqəsinə girərək 5 kiloqram 732,57 qram narkotik vasitə olan tiryəki qaçaq yolla İrandan gətiriblər.
MTN və Rusiyanın Narkotiklərin Dövriyyəsinə Nəzarət Federal Xidməti tərəfindən birgə həyata keçirilmiş əməliyyat tədbirləri nəticəsində «İran-Azərbaycan-Rusiya» marşrutu üzrə narkotik vasitələrin qaçaqmalçılığı ilə məşğul olan Azərbaycan vətəndaşı Nahid Feyziyev, milliyyətcə azərbaycanlı, RF vətəndaşları — İqbal Məmmədov, Aydın Ağayev, Namiq Ağayev və Azad Rufullayev Rusiyanın Rostov vilayətinin Volqodonsk şəhərində saxlanılıblar. Onlardan 1 kq heroin aşkarlanıb.