Dünən Azərbaycan Güləş Mərkəzində yunan-Roma güləşi üzrə milli komandamızın açıq məşqi keçirilib. Tədbirdə həmçinin komandaya yeni təyin olunmuş məşqçilər ictimaiyyətə təqdim olunub.
Yunan-Roma güləşi üzrə Azərbaycan millisinin baş məşqçisi vəzifəsində iranlı mütəxəssis Cəmşid Xeyrəbadi çalışır. Ona həmyerliləri Nasir Nurbaxış (böyük məşqçi) və Nezafat Dost Cəfər (məşqçi) kömək edirlər.
Media nümayəndələri yığmamızın məşq prosesini də izləyiblər. Daha sonra komandanın baş məşqçisi Cəmşid Xeyrəbadi jurnalistlərin suallarını cavablandırıb.
O bildirib ki, millidə ağır çəkidə çatışmazlıq var: «Bunu aradan qaldırmaq üçün də milliyə yeni legioner gətirəcəyik. Ancaq onun adını açıqlamayacağam. Buna səbəb tərəflər arasında danışıqların getməyidir. O, dünya çempionudur, özünü sübut etmiş, çox perspektivli güləşçidir. İnanıram ki, Azərbaycan yığmasına faydalı olacaq».
Xeyrabadi həmçinin hazırlıq prosesində yeniliklərin olacağını və yığmamızın yeni sistemdə məşq edəcəyini vurğulayıb. Onun sözlərinə görə, yığmamız əvvəl həftədə 3-4 dəfə məşq edirdisə, bundan sonra hər gün çalışacaqlar: «Yığmada məşqlərin sayı artırılaraq, gündə 2 dəfə olacaq. Bunun saat 10:30-da və 17:30-da olmağı nəzərdə tutulub. Əsas məqsəd Azərbaycanı dünyada 1 nömrə etməkdir. İnanıram ki, Azərbaycan güləşi dünyada parlayan ulduz səviyyəsinə qalxacaq».
Qeyd edək ki, İranın Sina şəhərində doğulmuş Xeyrabadinin son iş yeri ölkəsinin yığmasında köməkçi məşqçi vəzifəsi olub. O, İran yığmasının baş məşqçisi Məhəmməd Bananın rəhbərlik etdiyi məşqçilər korpusunda yer alıb.
İran yığması isə London Olimpiadasında məhz bu mütəxəssislərin rəhbərliyi altında böyük uğura imza atıb. Belə ki, cənub qonşularımızın Böyük Britaniya paytaxtında qazandığı 4 qızıl medaldan üçü yunan-Roma güləşçilərinin payına düşüb. Hətta 55 kq çəki dərəcəsində azərbaycanlı pəhləvan Rövşən Bayramov da finalda bu məşqçilərin yetirməsi Məhəmməd Soryana uduzmuşdu.
Yeri gəlmişkən, Xeyrabadiyə Azərbaycan millisinə qədər bir çox yığmalar təklif göndərsə də, bununla razılaşmayıb. Çalışdırıcının ölkəmizi seçməsində yığmamızın potensialı və hədəfləri əsas rol oynayıb.
Məşqçi yığmamızla Olimpiya tsikli — 4 illik müqaviləyə imza atıb. Əgər mütəxəssis özünü doğruldarsa, razılaşmanın müddətinin artırılması da istisna edilmir. Xeyrabadi İran komandasında çalışdığı vaxt yetirmələri dünya kuboku, dünya çempionatı, Asiya Oyunları və bir sıra turnirlərdə müxtəlif əyarlı medallar qazanıb. Sonda qeyd edək ki, yunan-Roma güləşi üzrə Azərbaycan millisinə bundan əvvəl türkiyəli mütəxəssis Salih Bora başçılıq edirdi.