Kişi voleybolçulardan ibarət Azərbaycan millisi dünya çempionatının I seçmə qrup mərhələsində çıxış edəcək. Xorvatiyanın paytaxtı Zaqrebdə keçiriləcək seçmə oyunlarının təqvimi müəyyənləşib. Millimiz ilk oyununu mayın 24-də ev sahiblərinə qarşı keçirəcək. Bir gün sonra Hollandiya ilə oynayacaqlar. Voleybolçularımız son görüşünü Bosniya və Herseqovinaya qarşı keçirəcək. I seçmə qrupun təqvimi belədir:

24 may
Azərbaycan – Xorvatiya
Hollandiya – Bosniya və Herseqovina

25 may
Xorvatiya — Bosniya və Herseqovina
Hollandiya – Azərbaycan

26 may
Bosniya və Herseqovina — Azərbaycan
Xorvatiya – Hollandiya

Qeyd edək ki, bu mərhələdə aşağı reytinqli komandalar oynayır. Reqlamentə görə, 7 qrupun qalibləri birbaşa III mərhələyə yüksəlir. İkinci yeri tutanlar oktyabrın 2-dən 6-dək keçiriləcək II mərhələdə daha 1 vəsiqənin sahibini müəyyənləşdirir. III mərhələdə bu 8 komandaya CEV-in reytinqinə görə ən yüksək yerə sahib 12 yığma da qoşulacaq. Beləliklə, III mərhələdə 20 yığma 7 vəsiqə uğrunda mübarizə aparacaq. Avropa Voleybol Konfederasiyasının qərarına görə, qitə çempionatında ilk 2 yeri tutan komanda birbaşa mundiala yüksəlir. Bu səbəbdən də onların III mərhələdə oynamasına ehtiyac qalmır. 2014-cü ildə Polşada olacaq dünya çempionatında Avropadan 9 kişi yığması mübarizə aparacaq.