Saatlı rayonunun əkin sahələri Mərakeş çəyirtkələrinin kütləvi hücumuna məruz qalıb —
Gomuşçu, Qaralar, Qaracalar, Azadakənd, Seyidlər, Əhmədbəyli və digər kəndlərində Mərakeş cəyitrkələri adlanan ziyanverici həşəratlar yoncalıqları, bostan, pambıq və digər min hektarlarla bitki sahələrini məhv edir. Yerli sakinlərin verdikləri məlumatlara görə, çəyirtkələr İran ərazisindən gəlib.

Görülən aqrotexniki dərmanlama işlərinə baxmayaraq, hər gün yüz minlərlə çəyirtkə adı çəkilən ərazilərdə kəndlilərin zəhmətini hədər edir. Cəmi iki kimyəvi dərmansəpən aqreqatın olduğunu bildirən kənd sakinləri bunun minlərlə hektar ərazi üçün azlıq etdiyini deyiblər.

Saatlı rayon Bitki Mühafizə Mərkəzinin rəisi Mirasimin Talıbov bu çəyirtkələrin sürfələrinin nəm və yağışlı havada məhv olduğunu bildirib: “Bu il isə adı çəkilən ərazilərdə quraqlıq olub. Ona görə də çəyirtkələrin kütləviliyi müşahidə olunur. Yaxın 10 gündə çəyirtkələrin ömrü bitəcək. Çətinliklə də olsa çalışırıq pambıq sahələrini qoruyaq. Yoncanın ikinci dəfə biçiləcəyinə ümid edirik. Amma pambıq bitkisini zədələndiyi halda məhv olur. Əlavə köməklik olarsa, daha effektli mübarizə aparmaq olar”.