Bu gün saat 15:00-a qədər Milli Elmlər Akademiyasının (MEA) əsas binasında akademik Mahmud Kərimovla vida mərasimi keçirilib. Ölkənin elm xadimləri, deputatlar və ziyalılar, sadə vətəndaşlar vida mərasimində iştirak etmək üçün gəlmişdilər. Prezident İlham Əliyev də vida mərasimində iştirak edirdi.

Mahmud Kərimov ötən gün qəfil ürəktutmasından dünyasını dəyişib. Mahmud Kərimov 18 oktyabr 1948-ci ildə İrəvan şəhərində doğulub. ADU Fizika fakültəsini bitirib. Yarımkeçiricilər və dielektriklər fizikası ixtisası üzrə doktorluq dissertasiyasını müdafiə edib. 2001-ci ildə Milli Elmlər Akademiyasının həqiqi üzvü seçilib, həmin ildən akademiyanın prezidenti idi.
Mahmud Kərimov I Fəxri xiyabanda torpağa tapşırılıb.