Qarabağ məsələsi müasir beynəlxalq münasibətlərdə ən çətin və aktual problemlərdən biridir. Bu strateji və vacib regionda bir çox ölkələrin və xalqların maraqları kəsişir. Bu mülahizəni APA-ya Tbilisidə Gürcüstan Humanitar-İqtisadiyyat Kollecinin dekanı Marina İzoriya deyib. Onun sözlərinə görə, Ermənistan-Azərbaycan arasında olan “dondurulmuş” Dağlıq Qarabağ münaqişəsi ilə bağlı hazırda mövcud olan “nə müharibə, nə sülh” vəziyyəti uzun müddət davam edə bilməz. İzoriya deyir:
“Dağlıq Qarabağ münaqişəsi ətrafında yaranan problemlər bölgənin Avropa Birliyi və ABŞ-la iqtisadi-ticarət əməkdaşlığının inkişafını çətinləşdirir. Ermənistan öz xarici siyasət prioritetlərinə yenidən baxmalıdır. Ən əsası isə, işğal etdiyi torpaqları Azərbaycana geri qaytarmalıdır”.