Kriminal avtoritetlər arasındakı bu insident Zaqatala rayonunda baş verib. Bir neçə gün əvvəl ölkənin şimal-qərb bölgəsindən olan kriminal avtoritetlər bir araya gələrək son vaxtlar ölkədə həbs edilən avtoritetlərlə bağlı müzakirələr aparıblar. Toplantı Zaqatalada baş tutub. Toplantıda onların bəziləri arasında fikir ayrılığı yaranıb və mübahisə düşüb. Toplantıda mübahisəyə son qoyan avtoritetlərdən bəziləri sonradan bu mübahisəyə yenidən qayıdıblar.
Əvvəllər müxtəlif cinayətlərlə dəfələrlə məhkumluq həyatı yaşayan Xaqani Bağıriani ilə Rəşad Rəsulov arasındakı mübahisə sonda bıçaqlanma ilə nəticələnib. Onların hər ikisi bir-birinə çoxsaylı bıçaq zərbələri endiriblər. Hər iki şəxs Zaqatala Mərkəzi Rayon Xəstəxanasına yerləşdirilib. Həkimlərin bildirdiyinə görə, yaralıların vəziyyəti ağır qiymətləndirilir.
Faktla bağlı Zaqatala Rayon Polis Şöbəsində cinayət işi başlanıb, istintaq tədbirləri davam etdirilir.
Hadisədə adı hallanan Xaqani Bağıriani və Rəşad Rəsulov kriminal aləmdə nüfuz sahibləri sayılırlar. «Oğru» aləmində kriminal avtoritet adı alan Xaqani Bağıriani bir müddət əvvəl həbsdən çıxıb. O, «Lotu Quli» kimi tanınan Nadir Səlifovun yaxın adamıdır.