«Kərkük əhalisi, burada yaşayan türkmənlər İraq dövlətinə çox bağlıdırlar və onlar heç vaxt ölkələrinin parçalanmasını istəməzlər. Amma İraq dövləti parçalansa, Kərkük vilayəti müstəqil dövlətə çevrilmək niyyətindədir». APA-nın məlumatına görə, bu barədə Bakıda səfərdə olan İraq parlamentinin üzvü, İraqın Kərkük vilayətindən olan deputat Jalə Neftçi Bakıda keçirdiyi görüşdə bildirib.
Onun sözlərinə görə, regionda həyata keçirilən və İraqın parçalanmasını nəzərdə tutan Orta Şərq layihəsi gerçəkləşsə, türkmənlər də özlərinə dövlət yaradacaqlar: «Bir türkmən milləti olaraq haqqımız var ki, öz dövlətimizi yaradaq. Ona görə də düşünmüşük ki, İraq bölünsə, bizim də bir dövlətimiz olsun».
Bununla yanaşı, millət vəkili hesab edir ki, İraqı parçalamaq asan deyil və dövlət özünü parçalanmadan qoruya biləcək: «Orta Şərq layihəsi təkcə İraq üçün deyil və müxtəlif dövlətləri əhatə edir. Amma İraqı bölmək o qədər də asan deyil. Ordu baxımından, milli duyğu baxımından İraq zəif dövlət deyil. Millətin torpağa bağlılığı çox dərindir. Ona görə də İraqı bölmək asan deyil. Məsələn, ölkə amerikanlar tərəfindən işğal olundu, hər yer bombalandı, minlərlə insan öldü. Amma ona baxmayaraq, İraq əhalisi amerikanların çıxmasını tələb etdi. Halbuki Amerikanın çıxmaq fikri yox idi. Elə bu hadisələr də göstərdi ki, İraqı parçalamaq o qədər asan deyil».
İraqlı deputat bildirib ki, ölkəsindəki etnik və dini qruplar bir-biri ilə razılıq əldə etməyə və birləşməyə çalışırlar, amma xarici qüvvələr buna mane olur.
Jalə Neftçi qeyd edir ki, hazırda İraqa xarici investisiyaların yatırılması üçün yaxşı şərait var və çoxsaylı xarici iş adamları İraqda bizneslə məşğul olurlar. Onun sözlərinə görə, hazırda İraqa bir sıra xarici ölkələrdən həm dövlət, həm də özəl şirkətlər tərəfindən investisiyalar yatırılır: «Onlar qorxmadan investisiya yatırırlar, çox da faydalar görürlər. İraqa yatırımlardan çox insanlar və şirkətlər fayda götürüblər».
Jalə Neftçi bildirib ki, hazırda İraqda müxtəlif sahələrə investisiyalar tələb olunur: «İraqın çox xidmətlərə, hər növ xidmətlərə ehtiyacı var, buna görə də hansı formada yatırım olsa, hər iki tərəfə faydalıdır».
İraqlı deputat ölkəsində təhlükəsizliklə bağlı vəziyyətin heç də xarici mətbuatda yayımlandığı kimi olmadığını göstərib. Onun sözlərinə görə, beynəlxalq xəbərlərdə İraq yalnız partlayış və ya terror aktı olanda göstərilir, amma reallıqda vəziyyət fərqlidir:
«Mətbuat təhlükəsizliklə bağlı məsələləri çox qabardır, İraq kifayət qədər təhlükəsizdir. Mən hər gün Kərkükdən Bağdada qədər öz maşınımda gedib-gəlirəm, heç bir hadisə baş vermir». Millət vəkili etiraf edib ki, hökumətin qərarı ilə deputatlar və məmurlara xüsusi mühafizə ayrılıb, amma əksər hallarda bunlara ehtiyac yoxdur: «Mənim 30 mühafizəçim var, amma bunları, sadəcə, qanunun tələbi olduğuna görə saxlayıram, yoxsa lazım deyil».