İlk dəfədir eşidirik ki, gömrükdə xidməti it iyləyib narkotik tapıb. “Muxtar” adlı itimizin İrandan Azərbaycana narkotik maddə keçirilməsinə imkan vermədiyi xəbəri yayıldı. Baxmayaraq ki, gömrükdə kineloji xidmət çoxdan var, ölkəmizdən ildə 11 ton narkotikin tranzit olaraq daşındığı dünyanın bütün hesabatlarında yer alır. İtlərimiz niyə «yatır», onlar sərhədi keçən nəqliyyatın hamısının yanına niyə buraxılmır? Düşündürücü suallardır.

Dövlət Gömrük Komitəsi mətbuat xidmətindən Trend-ə verilən məlumata görə, bu günlərdə DGK Gömrük Sahəsində Hüquqpozmalara qarşı Mübarizə Baş İdarəsinə daxil olmuş əməliyyat məlumatı əsasında Biləsuvar Gömrük İdarəsinin «Qoşa Təpə» gömrük postunda İrandan Azərbaycan Respublikasına gələn Türkiyə vətəndaşı Osman Alaettin Arasın idarə etdiyi «Scania» markalı, KHK624/VV113 dövlət nömrə nişanlı yük avtomobilinə «Muxtar» ləqəbli kinoloji xidmət itinin tətbiqi ilə gömrük baxışı həyata keçirilmiş və itin reaksiyasına əsasən malların aşkar edilməsini çətinləşdirən üsullardan istifadə edilməklə qoşqunun içərisindəki döşəmədə xüsusi düzəldilmiş metal lövhənin altında gömrük nəzarətindən gizlədilmiş 52 bağlamada ümumi çəkisi 26 kiloqram 60 qram narkotik vasitə-heroin aşkar edilərək götürülüb.
DGK İstintaq İdarəsində aparılmış istintaqla müəyyən edilib ki, Türkiyə vətəndaşı Osman Alaettin Aras satış məqsədi ilə qanunsuz olaraq narkotik vasitələri külli miqdarda əldə etmə, saxlama, daşıma və qaçaqmalçılıq yolu ilə Azərbaycanın gömrük sərhədindən keçirmə barədə İranda bir qrup şəxslə qabaqcadan əlbir olaraq cinayət əlaqəsinə girib, bu məqsədlə İranda 26 kiloqram 60 qram heroin əldə edib. O, malların aşkar edilməsini çətinləşdirən üsullardan istifadə etməklə idarə etdiyi yük avtomobilinin qoşqusunun içərisində gizli saxlanc yerində yerləşdirilib və «Qoşa Təpə» gömrük postunda Azərbaycanın gömrük sərhədindən qaçaqmalçılıq yolu ilə keçirməyə cəhd göstərib.

Aras barəsində 3 ay müddətinə həbs qətimkan tədbiri seçilib.
Hazırda cinayət işi üzrə istintaqın getdiyi bildirilir.
Bu fakt onu göstərir ki, itlərimiz «işləsə» nəticələr pis olmaz.