Sabah 17 günlük fasilədən sonra futbol üzrə Azərbaycan çempionatında növbəti turun oyunlarıdır. Öncəkilərdən fərli olaraq bu turun oyunları bir gündə təşkil olunacaq. Bütün matçların martın 30-da keçirilməsinə səbəb ertəsi gün Azərbaycanlıların Soyqırım Günü olması ilə bağlıdır.

Əsas diqqət ilk “altılıq”da final mərhələsinin II turunun oyunlarına yönələcək. Turun əsas qarşılaşması çempionatın liderləri – “Neftçi” və “İnter” arasındakı oyun sayılır. Hazırda lider “Neftçi” (45 xal) turnir cədvəlində özündən sonra gələn “İnter”in (44 xal) qonağı olacaq. “Bankirlər” son 2 mövsümün çempionunu “zirvə”dən endirmək üçün mütləq qələbə qazanmalıdırlar. Qonaqlar isə qalib gələcəyi halda, ən yaxın izləyici ilə xal fərqini artıracaq.

Turnir cədvəlinin üçüncü və dördüncü pillələrində qərarlaşan “Simurq” və “Qarabağ” isə liderlərin büdrəməsini gözləyirlər. Bu baxımdan hər iki komanda qələbə qazanıb, xallarını artırmağa çalışacaq. Doğrudur, onları “ev”də çətin sınaq gözləyir. Ağdam komandası çoxdandır qalib gələ bilmədiyi “Qəbələ”, Zaqatala klubu isə uzun məğlubiyyətsiz oyunlar seriyasını davam etdirən “Bakı” ilə qarşılaşacaq.

İkinci “altılıq”da isə günün mərkəzi qarşılaşması Lənkəranda olacaq. AZAL-ı qəbul edəcək “Xəzər Lənkəran” 7-ci yer uğrunda mübarizədə vacib xallar qazanmaq niyyətindədir. Rəqibi ilə xal fərqini minimuma endirməyə çalışacaq cənublular üçün bu oyun yeni baş məşqçi Con Toşakın rəhbərliyi altında ilk matç olacaq. Uelslinin ölkəmizdəki debüt etdiyi gündə “Sumqayıt” “Kəpəz”i, “Turan” “Rəvan”ı qəbul edəcək.

Bu görüşlər isə daha çox Premyer Liqada qalmaq uğrunda mübarizə baxımında əhəmiyyət kəsb edir.

30 mart
15:00. “Sumqayıt” – “Kəpəz”
“Bayıl Arena” stadionu
Təsnifat mərhələsindəki oyunlar: 0:0, 2:1

15:00. “Turan” – “Rəvan”
“Dalğa Arena” stadionu
Təsnifat mərhələsindəki oyunlar: 2:2, 0:2

15:00. “Qarabağ” – “Qəbələ”
Tofiq Bəhramov adına Respublika stadionu
Təsnifat mərhələsindəki oyunlar: 1:2, 1:1

17:00. “İnter” – “Neftçi”
“Şəfa” stadionu
Təsnifat mərhələsindəki oyunlar: 1:1, 0:2

17:00. “Simurq” – “Bakı”
Zaqatala şəhər stadionu
Təsnifat mərhələsindəki oyunlar: 0:0, 0:0

18:00. “Xəzər Lənkəran” – AZAL
Lənkəran şəhər mərkəzi stadionu
Təsnifat mərhələsindəki oyunlar: 2:0, 1:2