Azərbaycanın «AS Group Investment» Şirkətlər Qrupu Rusiyanın Sverdlovsk vilayətinin Nijni Tagil şəhərində yeni yaşayış kompleksi inşa edəcək. Kompleksin ümumi sahəsi 120 ha təşkil edir.

Layihəni həyata keçirən «AS Group Investment» Şirkətlər Qrupu Marketinq Departamentinin rəhbəri Elmir Kərimli «APA-Economics»ə bildirib ki, ərazidə 400-450 azmərtəbəli yaşayış evlərinin tikintisi nəzərdə tutulub. Evlər sakinlərə tam təmirli şəkildə təhvil veriləcək.

Qeyd edək ki, yaşayış kompleksi təxminən 30 000 nəfərin yaşayışı üçün nəzərdə tutulub. Layihəyə əsasən, yaşayış kompleksində uşaq bağçaları, məktəblər, yerüstü parkinq, mərkəzi qazanxana və istilik sistemi, su təchizatı, kanalizasiya, drenaj və kanalizasiya nasosları qurulacaq.

Həmçinin, kompleks abadlaşdırılacaq və daxili yol sistemi ilə təchiz olunacaq.

Kompleksin tikinti işləri 2014-cü ildə başlayacaq.