Futbol üzrə Azərbaycan kuboku uğrunda yarışın final matçında üz-üzə gələcək komandalar müəyyənləşib. Kubokun həlledici oyununa “Xəzər Lənkəran” və “Neftçi” vəsiqə qazanıb. “Xəzər Lənkəran” yarımfinalda “Bakı”nı mübarizədən kənarlaşdırıb. Uelsli mütəxəssis Con Toşakın başçılıq etdiyi Lənkəran komandası ilk oyunda uduzmasına baxmayaraq (0:1), cavab matçında revanş çıxa bilib. Ağabala Ramazanov və Rahid Əmirquliyevin qolları sayəsində 2:0 hesablı qələbə qazanan Lənkəran təmsilçisi finala adlayıb.
“Neftçi” isə farımfinalda “Qarabağ”ı yarışlardan uzaqlaşdırıb. Tərəflərin ilk matçında “flaqman” 2:1 hesabı ilə qalib gəlmişdi. Cavab oyununda “Qarabağ” nə qədər çalışsa da, rəqibi üstələyə bilməyib – 2:2.
İki prinpisial komanda – “Neftçi” və “Xəzər Lənkəran” arasında Azərbaycan kubokunun final görüşü mayın 28-də Tofiq Bəhramov adına Respublika stadionunda keçiriləcək. Matçın başlama saatı hələ bəlli deyil.
Azərbaycan Kubokunun final oyununda nominal ev sahibi olacaq komanda müəyyənləşib. Peşəkar Futbol Liqasında “Neftçi” və “Xəzər Lənkəran”ın nümayəndələrinin iştirakı ilə keçirilmiş püşkatmaya əsasən «Neftçi» Azərbaycan Kubokunun final oyununda nominal ev sahibi olacaq.

Xatırladaq ki, “Neftçi” klubu 6 dəfə Azərbaycan kubokunun final oyununda meydançaya çıxıb və 4 dəfə yarışın qalibi olub. “Xəzər Ləmkran” isə 4 dəfə finalda oynayıb və 3 dəfə kuboka sahib çıxıb. “Neftçi” və “Xəzər Lənkəran” ölkə kubokunun final oyununda ilk dəfə üz-üzə gələcəklər.