Bakı Apellyasiya Məhkəməsində SQ Baş Klinik Hospitalının həkimi, tibb xidməti polkovnik-leytenantı Vasif Adıgözəlovun cinayət işi üzrə məhkəmə prosesi başa çatıb. Prosesdə qərar elan olunub. Qərara əsasən, hökm dəyişdirilib. CM 70-ci maddəsinin tətbiqi hökmdən xaric edilib. Adıgözəlov məhkəmə zalında həbs edilib.

…2011-ci il sentyabrın 29-da vəfat edən əsgər Eldar Novruzovun valideynləri KİV-ə açıqlamalarında övladlarına həkim Vasif Adıgözəlov tərəfindən səhv diaqnoz qoyulduğu üçün vəfat etdiyini bildirmişdilər. Bundan sonra Respublika Hərbi Prokurorluğunda əsgərin ölümü ilə bağlı araşdırmalara başlanılıb. Lakin V. Adıgözəlov həmin ittihamları qəbul etməyib. Adıgözəlov Bakı Hərbi Məhkəməsinin hökmü ilə 3 il 6 ay müddətinə azadlıqdan məhrum edilib. CM 70-ci maddəsi (cəzanın şərti hesab olunması) tətbiq olunmaqla, ona verilmiş cəza şərti hesab olunub. Bundan başqa, məhkəmə onun 500 manat məbləğində cərimə olunması barədə də qərar qəbul edib. Hökmdən narazı qalan Eldar Novruzovun ailəsi apellyasiya şikayəti verərək, Adıgözəlovun cəzasının ağırlaşdırılmasını istəyiblər.

Sumqayıt Hərbi Komissarlığından hərbi xidmətə çağırılan 1992-ci il doğumlu Eldar Novruzov Mingəçevirdə N saylı hərbi hissədə xidmət edib. Burnunda aparılan əməliyyatdan sonra vəziyyəti ağırlaşan E. Novruzov sentyabrın 29-da Gülhanə Tibb Akademiyasına aparılarkən yolda dünyasını dəyişib.

Adıgözəlov CM 313-cü (vəzifə saxtakarlığı), 341.1-ci (rəisin və ya vəzifəli şəxsin hakimiyyətdən və ya öz qulluq mövqeyindən sui-istifadə etməsi) və 342.2-ci (qulluğa səhlənkar yanaşma) maddələri ilə ittiham edilib.