Ehtiyatda olan zabitlər Ədliyyə Nazirliyi və müdafiə nazirinin evi önündə piketə hazırlaşırlar. “Ehtiyatda və İstefada olan Zabitlər” İB martın 9-da saat 15.00-da və 17.00-da Ədliyyə Nazirliyi və müdafiə naziri Səfər Əbiyevin Qızıl Şərq hərbi şəhərciyində yerləşən malikanəsinin qarşısında piket keçirilməsi üçün Bakı İcra hakimiyyətinə müraciət edib. Hər iki piketdə 30-40 nəfərin iştirakı nəzərdə tutulur, deyə Turan-ın xəbərində deyilir.

Ehtiyatda olan zabitləri anlamaq olar: indi ölkədə evlərin qarşısında aksiya keçirmək presedenti var. Məsələn: Əli Kərimlinin, Əkrəm Əylislinin evlərinin qarşısındakı aksiyaları xatırlamaq olar. Özü də polis onlara müdaxilə etmədi. Zabitlər niyə bu «pozitiv» təcrübədən faydalanmasın?

Piket “Məhkəmə qətnamələri icra edilsin!”, “Qanunların aliliyini pozanlar cəzalandırılsın!”, “Pul kompensasiyaları ödənilsin!”, “S.Əbiyevin xaricə çıxışına qadağa qoyulsun!”, “Məhkəmə hakimiyyətini iflic edən məmurlara ar olsun!”, “Pensiya hüququmuz təmin edilsin”, “Qorxaq icra məmurları işdən çıxarılsın”, “Özbaşınalığa son qoyulsun!” və sair bu kimi sosial yönümlü şüarlarla keçiriləcək.

Aksiyalar zabitlərə istifadə olunmamış məzuniyyətə görə vəsaitlərin və cəbhəyanı zonada xidmətə görə əlavə ödənişlərin ödənilməsi haqqında şikayətlər üzrə 17 məhkəmə qərarının icra edilməməsi ilə əlaqədar həyata keçirilir.