Milli serialların çəkilməsi üçün telekanallara maliyyə vəsaitinin ayrılması gündəmdədir. Çalışacağıq ki, bu məsələ lap yaxın aylarda öz həllini tapsın. Bu açıqlamanı APA-ya Milli Televiziya və Radio Şurasının sədri Nuşirəvan Məhərrəmli bildirib. O deyib ki, fevral-mart aylarında serial çəkilişlərinə maliyyə vəsaitinin ayrılmasına dair ölkə başçısı tərəfindən qərar veriləcək.
Şura sədri ayrılacaq maliyyənin məbləği ilə bağlı bir söz deyə bilməyəcəyini vurğulayıb. O qeyd edib ki, hazırda serial çəkilişləri dövlət vəsaiti hesabına deyil, kanalların öz gücü ilə davam etdirilir: “Dövlət hər il serial çəkilişlərinə maliyyə ayırmaq kimi bir öhdəlik götürməyib. Ayrılacaq vəsait 2013-cü il üçün nəzərdə tutulacaq”.
N. Məhərrəmli onu da deyib ki, hələlik ayrılacaq maliyyənin regional kanallara aid edilib-edilməyəcəyi dəqiq deyil: “Vəsait ayrılandan sonra onun hansı kanallara aid edilməsi məsələsi müzakirə ediləcək”.