Qaradağ Məhkəməsində yanvarın 19-da “Binə” Ticarət Mərkəzində keçirilən aksiya zamanı saxlanılan şəxslərin cinayət işi üzrə məhkəmə prosesi başa çatıb və hökm oxunub. Təqsirləndirilən şəxslərdən 2 şəxs 4 il, 3 nəfər 1 il 6 ay, digərləri isə 1 il müddətinə azadlıqdan məhrum ediliblər.

Yanvarın 19-da «Binə» Ticarət Mərkəzində fəaliyyət göstərən bir qrup iş adamı rəhbərliyin icarə haqqını qaldırmasına etiraz olaraq Bakı-Astara magistralının ticarət mərkəzinin yaxınlığından keçən hissəsini bağlamağa cəhd göstərib və nəqliyyatın hərəkətini iflic ediblər. Xəbərdarlığa məhəl qoymayan aksiya iştirakçıları polis əməkdaşlarına müqavimət göstəriblər və nəticədə, 10 polis müxtəlif dərəcəli bədən xəsarətləri alıb, bir neçə xidməti avtomobilə isə ziyan vurulub. Aksiya iştirakçısı olan 10 nəfər — Malik Məhərrəmov, Nicat Paşayev, Əbülfəz Əliyev, Samir Zeynalzadə, Səid Ədilov, Məhəmməd Mürsəliyev, Elnur Əliyev, Samid Hüseynov, Qüdrət Kişiyev və Vaqif İbrahimov polis əməkdaşları tərəfindən saxlanılaraq istintaq orqanına təhvil verilib.

Faktla bağlı Bakı şəhər Prokurorluğunda Cinayət Məcəlləsinin 221.3 (xuliqanlıq) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə cinayət işi başlanıb.