Klassik-2 şirkətinin prezidenti Şamil Heydərov bir neçə ay əvvəl Qaradağ Rayon Polis İdarəsinin 10-cu Polis Bölməsinə ərizə ilə müraciət edərək “Sədərək” Ticarət Mərkəzində yerləşən özünə məxsus obyektdən oğurluq edilməsi barədə məlumat verib. Şikayətçi qeyd edib ki, naməlum şəxslər obyektin dəmir örtüklü pəncərəsini açma yolu ilə onun xidməti otağında yerləşən seyfdən 210 min ABŞ dolları və 10 min manat oğurlayıblar.

DİN Baş Cinayət Axtarış İdarəsi və Bakı Şəhər Baş Polis İdarəsinin Cinayət Axtarış İdarəsi əməkdaşlarının birgə keçirdiyi əməliyyat-axtarış tədbirləri nəticəsində hadisəni törədən Astara rayon sakini Yusif Bağırov tutulub. Araşdırmalar zamanı müəyyən edilib ki, Bağırov əvvəllər Heydərovun firmasında işləyib. Bağırov polisə verdiyi ifadəsində oğurluğu xəstə dostunu müalicə etdirməkdən ötrü törətdiyini bildirib. Aparılan təhqiqat zamanı bu fakt təsdiqini tapıb. Faktla bağlı cinayət işi başlanıb, istintaq gedir.