Bakıda peşəkar oğru yaxasını ələ verib. Necə deyərlər, su sənəyi suda sınar. Bir gün yaxası ələ keçməli idi. Bu adam üçün qapı, ya pəncərə, mənzilin hansı mərtəbədə yerləşməsi — bir elə fərqi yox imiş. İmkan olan yerdən evə girə bilirmiş. Açarseçmə üsulunu pis bilmirmiş. Girdiyi evdə pul, qızıl-zinət əşyaları, hətta ərzaq… əlinə nə düşdü aparırmış.
Paytaxtın Baş Polis İdarəsindən dünən «Trend»ə verilən məlumata görə, Nizami rayon Polis İdarəsi 23-cü Polis Bölməsi əməkdaşlarının əməliyyat tədbirləri nəticəsində oğurluqda şübhəli bilinən Anar Həsənov tutulub. Onu mənzillərdən qızıl-zinət əşyalarının oğurluğunda təqsirləndirirlər.
Həsənov ötən il aprelin 15-də M.Ağayev küçəsində yaşayan Rasimə Qurbanovanın evindən açarseçmə yolu ilə qızıl-zinət əşyaları və ərzaq malları, bu il fevralın 15-nə keçən gecə N.Abdullayev küçəsində yaşayan Rasim Əliyevin evindən pəncərədən keçmə yolu ilə 950 manat və qızıl-zinət əşyaları, noyabrın 27-dən 29-dək olan müddətdə Buzovna qəsəbəsi Xətai küçəsində yaşayan Afiq Yusifovun evindən açarseçmə yolu ilə qızıl-zinət əşyaları, dekabrın 9-da isə M.Ağayev küçəsində yaşayan Telman Əsədovun evindən pəncərədən keçmə yolu ilə pul və qızıl-zinət əşyaları oğurlayıb.