Cari ilin (İranda il martın 21-də dəyişir) ilk 8 ayı ərzində İrandan Azərbaycana 33 milyon dollar həcmində (portfel ticarəti vasitəsilə) məhsul ixrac edib ki, bu da ötən ilin müvafiq dövrü ilə müqayisədə 53 faiz çoxdur. «Trend»in məlumatına görə, bu barədə cümə axşamı IRNA agentliyi Astara gömrük məntəqəsinin direktoru Cahangir Bəxşiyə istinadən məlumat verir.
Onun sözlərinə görə, İran ilk 8 ayda Azərbaycana 13 min ton məhsul ixrac edib ki, bu da ötən il müvafiq dövründə ixrac edilən məhsulların həcmindən 34 faiz çoxdur. İran və Azərbaycan arasında əsasən portfel ticarəti aparılır və Bəxşinin sözlərinə görə, malların böyük hissəsi Azərbaycana turistlər vasitəsilə ixrac edilib.
Bəxşi qeyd edib ki, son 9 ayda İran Azərbaycan, Rusiya və Gürcüstana 270 milyon dollar dəyərində 516 min ton qeyri-neft məhsulları ixrac edib. Ötən ilin müvafiq dövrünə nisbətən ixrac mallarının həcmi 21 faiz, məbləği isə 10 faiz artıb. Bəxşi vurğulayıb ki, artım əsasən sement və kənd təsərrüfatı məhsullarının ixracı hesabına qeydə alınıb.